हेटौंडाः हेटौंडा उपमहानगरपालिकाभित्रका तीन वटा विद्यालय बालमैत्री विद्यालय घोषणा भएको छ । मंगलबार हेटौंडा उपमहानगरपालिकाकी प्रमुख मीनाकुमारी लामाले तीनवटै विद्यालयलाई बालमैत्री विद्यालय घोषणा गर्नुभयो ।
नगर प्रमुख लामाले हेटौंडा–१६ स्थित जनप्रिय मावि, हेटौंडा–८ स्थित चन्द्रोदय मावि र हेटौंडा–२ स्थित बालजागृति बोर्डिङ स्कूललाई बालमैत्री विद्यालय घोषणा गर्नुभएको हो । बालमैत्री घोषित जनप्रिय र चन्द्रोदय सरकारी विद्यालय हो भने बालजागृति नीजि विद्यालय हो ।
जनप्रिय माविका प्रधानाध्यापक भुपेन्द्र चौलागाईंले जनप्रिय बाल समूहले सञ्चालन गरेका शैक्षिक गतिविधिहरुको प्रतिवेदन प्रस्तुत गर्नुभयो । उहाँले विद्यालयमा बाल समूहलाई प्रभावकारी र व्यवस्थित बनाउन शैक्षिक गतिविधिसँग जोडिँदै कार्यहरु गर्दै आइरहेको बताउनुभयो । यसका लागि विद्यालयमा बाल समूहको गठन र वडा तहमा बाल समूह सञ्जाल निर्माण गरेको उहाँले बताउनुभयो । यसले विद्यार्थीमा बाल अधिकार, संविधानका निर्देशित हक अधिकारका बारेमा सुसूचित हुने अवसर पाएको उहाँले बताउनुभयो । विद्यालयले बालविवाह अन्त्यका लागि सचेतना र जनजागरणमूलक ¥याली, भित्ते लेखन र प्रविधिमैत्री बाल कक्षाको पनि व्यवस्था गरेको उहाँले बताउनुभयो ।
बाल समूहकी अध्यक्ष सृष्टि अधिकारीको सभाध्यक्षतामा भएको कार्यक्रममा हेटौंडा उपमहानगरपालिकाका उपप्रमुख राजेश बानियाँ, हेटौंडा–१६ का वडाध्यक्ष रामकृष्ण कोइराला र राष्ट्रिय परीक्षा बोर्ड हेटौंडाका प्रमुख कृष्ण घिमिरेलगायतको आतिथ्य रहेको थियो ।
यस्तै, चन्द्रोदय माविका प्रधानाध्यापक जीधराज ढकालले विद्यालयले बालमैत्री विद्यालय घोषणाका लागि विभिन्न सूचक पूरा गरेर नगरपालिकाबाट अनुमति प्राप्त गर्न सफल भएको बताउनुभयो । उहाँले विद्यालयले बालमैत्री भौतिक संरचना, वातावरण र आचारसहिंता पूरा गरेको बताउनुभयो । उहाँले विद्यालयले अतिरिक्त क्रियाकलापहरुलाई थप व्यवस्थित गरेर लैजाने बताउनुभयो । उहाँले विद्यालयले विद्यालय व्यवस्थापन समितिमा एक–एक जना छात्रा र छात्र विद्यार्थी अनिवार्य सहभागी गराउन सुरु गरेको बताउनुभयो । यसले विद्यार्थीको सर्वाङ्गीण विकासमा महत्वपूर्ण भूमिका निर्वाह गर्ने उहाँले बताउनुभयो । विद्यालय व्यस्थापन समितिका अध्यक्ष इवाकर मैनालीको सभाध्यक्षतामा भएको कार्यक्रममा हेटौंडा–८ का वडाध्यक्ष रामकृष्ण थापा, विद्यालयकी बाल समूहकी अध्यक्ष सुप्रिया मोक्तान, अन्य वडाका वडाध्यक्ष र अभिभावकहरुको पनि उपस्थिति रहेको थियो ।
बालजागृतिका प्रिन्सिपल विनोद सुवेदीले बालमैत्री घोषणाका लागि स्कूलले विभिन्न सूचकहरु पूरा गरेको बताउनुभयो । स्कूलले बालमैत्री आचारसंहिता निर्माण, बालविवाहसम्बन्धी चेतनामूलक कार्यक्रम, सेनेटरी प्याडको व्यवस्था, बालविकास केन्द्र र दैनिक खाजा तालिका, बालमैत्री आचारसंहिताबारे छलफल, विद्यालयमा अतिरिक्त क्रियाकलाप सञ्चालन गरेको अभिलेख र बाल समूहको नियमित बैठक बसेको बताउनुभयो । स्कूल सञ्चालक समितिका अध्यक्ष दिनेशप्रसाद भण्डारीको सभाध्यक्षतामा भएको कार्यक्रममा हेटौंडा–२ का वडाध्यक्ष विष्णुगोपाल महर्जनलगायत अन्य वडाका वडाध्यक्षहरुको आतिथ्य रहेको थियो ।
