हेटौंडाः बागमती प्रदेश सरकारका मुख्यमन्त्री शालिकराम जम्कट्टेलले २ वटा प्रहरी भवनको उद्घाटन गर्नुभएको छ । बुधबार मुख्यमन्त्री जम्कट्टेलले प्रदेश सरकारको सहयोगमा हेटौंडामा नवनिर्मित दुई वटा प्रहरी भवनको उद्घाटन गर्नुभएको हो ।
बागमती प्रदेश विपत् व्यवस्थापन गुल्म हेटौंडा र वडा प्रहरी कार्यालय हेटौंडाको भवन आन्तरिक मामिला तथा योजना मन्त्रालयमार्फत् निर्माण गरिएको हो । हेटौंडा–११ स्थित बागमती प्रदेश विपत् व्यवस्थापन गुल्मको भवन तीन करोड २८ लाख १२ हजार ५८ रुपियाँमा निर्माण भएको छ । यस्तै, हेटौंडा–४ मा नवनिर्मित वडा प्रहरी कार्यालय तीन करोड ९० लाख ३१ हजार ३३८ रुपियाँको लागतमा निर्माण गरिएको हो ।
भवन उद्घाटन कार्यक्रममा बागमती प्रदेशका आन्तरिक मामिला तथा कानुनमन्त्री गंगानारायण श्रेष्ठ, मन्त्रालयका सचिव ध्रुव गैँडा, बागमती प्रदेश प्रहरी कार्यालयका प्रमुख प्रहरी नायव महानिरीक्षक विष्णुकुमार केसीको उपस्थिति रहेको थियो । कार्यक्रममा प्रहरी उपरीक्षक इन्जिनियर ईश्वर थापाले नवनिर्मित भवनका बारेमा जानकारी गराउनुभएको थियो ।
