हेटौँडाः लागुऔषध गाँजा र चरेशसहित ३ जनालाई मकवानपुर प्रहरीले पक्राउ गरेको छ ।
मकवानपुर जिल्लाको भीमफेदी गाउँपालिका–२, भैँसेस्थित प्रहरी चेकपोष्टमा मंगलबार दिउँसो साढे २ बजेको समयमा पालुङबाट हेटौँडातर्फ आउँदै गरेको ना ४ ख ६०९१ नम्बरको बसलाई रोकी सुरक्षाजाँच गर्ने क्रममा बसमा सवार थाहा नगरपालिका–८, आग्राका ३० वर्षीय बिमल स्याङ्तान, कैलाश गाउँपालिका–१, खोलाखर्कका ५२ वर्षीय चन्द्र बहादुर घलान र भीमफेदी गाउँपालिका–१, किटनीका ३२ वर्षीय नवराज तामाङको साथबाट ४५ केजी गाँजा र ५ केजी चरेशसहित पक्राउ गरिएको बागमती प्रदेश प्रहरी कार्यालय हेटौँडाले जानकारी दिएको छ । उनीलाई प्रहरीले हिरासतमा राखी थप अनुसन्धान गरिरहेको जनाएको छ ।
