हेटौंडाः कोरोना भाइरसको जोखिम न्यूनीकरण गर्न भन्दै सरकारले चैत ११ गतेदेखि लकडाउन घोषणा गरेसँगै तीन महिना जनजीवन ठप्प भयो । व्यवसायीहरु प्रत्यक्ष मारमा परे । व्यवसायीका लागि खान, लाउन भन्दा पनि बैंकबाट लिएको ऋणको किस्ता कसरी तिर्ने भन्ने चिन्ता मुख्य रह्यो । लकडाउनमा व्यवसायी मारमा परेकै बेला बैंकले भने मनलाग्दी गरेको छ । एनआईसी एसिया बैंकको हेटौंडा शाखाले आफुखुसी ऋणीको खातामा ऋण बढाएर व्याज असुली गरिरहेको छ ।
हेटौंडा–१० का व्यवसायी अमृत रत्न मानन्धर र अतित मानन्धर (बाबु–छोराको संयुक्त) को खातामा एनआईसी एसिया बैंकको हेटौंडास्थित शाखाले चार लाख ६० हजार रुपैयाँ ऋण थपिदिएर त्यही थपिदिएको पैसाबाट २०७६ चैत, २०७७ बैंशाख र जेठ महिनाको व्याज रकम असुली गरेको छ । ऋणी मानन्धरले फागुनसम्मको व्याज बुझाएका छन् । ऋणको व्याज र सकेसम्म साँवा समेत नियमित बुझाउँदै आएका व्यवसायी मानन्धर फागुनसम्मको व्याजको किस्ता बुझाएर ढुक्क बसेका बेला लकडाउनकै बेला बैंकले आफुखुसी ऋण रकम बढाएर व्याज असुली गरेको देखेर त्रसित बनेका छन् । बैंकरले नै ऋणीको खातामा आफुखुसी ऋण बढाएर ऋणको व्याज लिने र ऋणीलाई ऋणको भार मात्रै बढाउने कार्य गैरकानुनी भएको बताउँछन् ।
बैंकको समस्यालाई लिएर बिहिबार मकवानपुर उद्योग वाणिज्य संघ अध्यक्ष कृष्ण कटुवालको सहजीकरणमा बैंकका हेटौंडा शाखा प्रबन्धक दिपक श्रेष्ठ, ऋणी अतित मानन्धरबीच छलफल समेत भएको छ । बैंकका शाखा प्रबन्धक दिपक श्रेष्ठले ऋण सम्झौताअनुसार नै ऋणीको सहमतिमै थप ऋण स्वीकृत गरी व्याज कट्टा गरेको दावी गर्नुभयो । ऋणी अतित मानन्धरले भने फागुन महिनासम्मको व्याज चुक्ता गरेपछि बैंकबाट थप ऋण र किस्ताको विषयमा कुनै कुराकानी नभएको स्पष्ट पार्नुभयो । मकवानपुर उद्योग वाणिज्य संघका अध्यक्ष कृष्ण कटुवालले लकडाउनको समयमा उद्योगी, व्यवसायी मारमा परेको उल्लेख गर्नुहुँदै बैंकले सहयोग गर्नुपर्ने बताउनुभयो । निजी क्षेत्रको बैंकले निजी क्षेत्रकै व्यवसायीको हितमा ध्यान दिनुपर्ने पनि बताउनुभयो । छलफलपछि बैंकले असारदेखि व्याजदर घटाएर सहयोग गर्ने बताएको ऋणी अतित मानन्धरले जानकारी दिनुभयो ।
