फापरबारी (बागमती)ः मकवानपुरको बागमती गाउँपालिकामा जारी छैठौंं संस्करणको बागमती गोल्डकप फुटबल प्रतियोगिता अन्तर्गत आज बिहिबारबाट क्वार्टरफाइनल चरणका खेलहरु सुरु हुँदैछ । बागमती–८, फापरबारीस्थित जनता माविको खेलमैदानमा आज हुने पहिलो क्वार्टरफाइनल खेलमा न्यू रोड टिम (एनआरटी) र सिमराको नव जनजागृति युवा क्लबबीच प्रतिस्पर्धा हुनेछ ।
यसअघि हिजो बुधबार आयोजक बागमती खेलकुद विकास समितिको टिमले हिमालयन शेर्पा क्लबलाई पराजित गरेको थियो भने उद्घाटन खेलमा मच्छिन्द्र क्लबले सर्लाहीको बागमती युथ क्लबलाई पराजित गरेको थियो । प्रतियोगिताको फाइनल खेल फागुन १० गते हुनेछ । प्रतियोगिताको विजेता टोलीले १० लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले ५ लाख रुपैयाँ प्राप्त गर्नेछ । यस्तै सर्वोत्कृष्ट खेलाडीले १ लाख १ हजार रुपैयाँ र अन्य विधागत उत्कृष्टले २५–२५ हजार रुपैयाँ प्राप्त गर्नेछन् ।
