हेटौंडाः मकवानपुरको भीमफेदी गाउँपालिका–१, बाघझोरास्थित हेटौंडा–भैंसे सडकखण्डमा टिपर सडकबाट खसेर पल्टिदा एक जना घाइते भएका छन् । घाइते हुनेमा टिपर चालक हेटौंडा–६ स्थित चौघडाका २० वर्षीय काशी राज सिलवाल रहेको जिल्ला प्रहरी कार्यालय मकवानपुरले जनाएको छ ।
मंगलबार बिहान ५ बजेर ५० मिनेटको समयमा उक्त सडकखण्डमा हेटौंडाबाट भैंसे जाँदै गरेको बागमती प्रदेश ०३–००१ क ५४३ नम्बरको खाली टिपर आफै अनियन्त्रित भएर सडकबाट एक सय मिटर तल खस्दा दुर्घटना भएको हो । दुर्घटना हुँदा टिपर चालक सिलवालको ढाडमा भित्री चोट लागेको जनाएको छ । टिपर पल्टिएर दुर्घटना भएको खबर प्राप्त हुनासाथ प्रहरी चौकी भैंसेबाट प्रहरी टोली खटेर घाइते चालकहलाई उपचारका लागि हेटौंडा अस्पतालमा ल्याइएको छ ।
