हेटौंडाः बागमती प्रदेशमा एकै दिन २ जना मृत फेला परेका छन् । प्रदेशको काभ्रेपलाञ्चोक र सिन्धुपाल्चोक जिल्लामा २ जना मृत फेला परेको बागमती प्रदेश प्रहरी कार्यालय हेटौंडाले जानकारी दिएको छ ।
काभ्रेपलाञ्चोक जिल्लाको पाँचखाल नगरपालिका–२, अनेकोट जलढुङ्गामा एक जना महिला मृत फेला परेकी छन् । मृत फेला पर्नेमा ४० वर्षीया सुक्रा मिजार रहेको प्रहरीले जानकारी दिएको छ । मिजार गत बुधबार बेलुका आफुखुशी घरबाट निस्किई हिँडेकोमा आफन्तहरुले खोजतलास गर्दै जाँदा मंगलबार बिहान १० बजेको समयमा घरदेखि एक सय मिटर तल खोल्सामा मृत अवस्थामा फेला परेको प्रहरीले जानकारी दिएको छ । मुचुल्कापश्चात् शव पोष्टमार्टमको लागि धुलिखेल अस्पताल लगिएको छ ।
सिन्धुपाल्चोक जिल्लाको चौतारा साँगाचोकगढी नगरपालिका–२, बतासेमा एक जना पुरुष मृत फेला परेका छन् । मृत फेला पर्नेमा ४३ वर्षीय प्रेमबहादुर थापा रहेको प्रहरीले जानकारी दिएको छ । लामा मंगलबार बिहान ११ बजेको समयमा स्थानीय आइते लामाका मानिस बसोबास नगर्ने घरको पिँढीमा मृत अवस्थामा फेला परेका थिए । अनुसन्धानका क्रममा लामाले सधैं मादक पदार्थ सेवन गर्ने गरेको पाइएको प्रहरीले जानकारी दिएको छ । मुचुल्कापश्चात् शव पोष्टमार्टमका लागि जिल्ला अस्पताल लगिएको छ ।
