हेटौंडाः हेटौँडा उपमहानगरपालिका वडा नम्बर ७ को आयोजनामा भइरहेको ७ नम्बर वडाभित्रका बाल समूहस्तरीय नकआउट फुटबल प्रतियोगिताको फाइनलमा अग्राठे बाल समूह र इच्छा–जागृती बाल समूह भिड्ने भएका छन् । हेटौंडा–७ स्थित नवज्योति खेलमैदानमा भइरहेको प्रतियोगिताको फाइनल खेल मंगलबार दिउँसो हुनेछ ।
अग्राठे बाल समूह प्रतियोगिताको समूह “क” को बिजेता बन्दै फाइनलमा प्रवेश गरेको हो भने इच्छा–जागृती बाल समूह प्रतियोगिताको समूह “ख” को बिजेता बन्दै फाइनलमा प्रवेश गरेको हो । सोमबार भएको पहिलो सेमिफाइनलमा इच्छा–जागृती बाल समूहले प्रगति बाल समूहलाई २–१ गोलअन्तरले हराउँदै फाइनलमा प्रवेश गरेको हो । त्यस्तै सोमबार नै भएको दोश्रो सेमिफाइनल खेलमा अग्राठे बाल समूहले स्मृति बाल समूहलाई ३–० गोलअन्तरले हराउँदै फाइनलमा प्रवेश गरेको हो ।
नकआउट प्रणालीको आधारमा भएको प्रतियोगितामा १० वटा बाल समूहको सहभागी रहेको थियो । प्रतियोगितामा प्रथम हुने टिमले नगद १० हजार रुपैयाँसहित शिल्ड, मेडल र प्रमाणपत्र प्राप्त गर्नेछ । यस्तै प्रतियोगितामा द्वितीय हुने टिमले नगद ५ हजार रुपैयाँसहित शिल्ड, मेडल र प्रमाणपत्र प्राप्त गर्नेछ ।
