हेटौंडाः मकवानपुर जिल्लाको मकवानपुरगढी गाउँपालिका–१, फुलबारीमा एक वृद्धाको हत्या भएको छ । आज बिहान करिब ४ बजेको समयमा प्युठान जिल्लाका ३९ वर्षीय पदमबहादुर नेपालीले आफ्नै सासुआमा ७२ वर्षीया कान्छीमाया भोम्जनको हत्या गरेको जिल्ला प्रहरी कार्यालय मकवानपुरका प्रहरी नायव उपरीक्षक (डीएसपी) ईन्द्रबहादुर रानाले जानकारी दिनुभएको छ ।
घटनास्थल पुग्नुभएका डीएसपी रानाका अनुसार मादक पदार्थ सेवन गरेका पदमबहादुरले खुर्पा प्रयोग गरेर सासुको हत्या गरेका हुन् । प्रहरीले पदमबहादुरलाई नियन्त्रणमा लिएर घटनाको अनुसन्धान गरिरहेको जनाएको छ । काठमाडौं बस्दै आएका पदमबहादुर उसको परिवार लकडाउनका बेला मकवानपुरगढी गाउँपालिका–१, फुलबारीस्थित ससुरालीमा आएर बसेका थिए । पदमबहादुर श्रीमति, तीन छोरीसहित सासु कान्छीमायाकै घरमा बस्दै आएका थिए । बिहान नातिनीले चिया दिन जाँदा हजुरआमा मृत भेटिएपछि प्रहरीलाई जानकारी आएको डीएसपी रानाले बताउनुभयो ।
