![manahariward](https://samriddhasamaj.com/wp-content/uploads/2020/06/manahariward-696x522.jpg)
हेटौंडाः मकवानपुरको मनहरी गाउँपालिकाले ६ वटा वडा कार्यालयको भवन निर्माण कार्य सुरु गरेको छ । बुधबार २ नम्बर वडा कार्यालयको भवन सिलान्यास गरिएको छ । गाउँपालिकाका अध्यक्ष एकराज उप्रेतीले मनहरी–२, भुन्द्रङटाँडीमा भवनको सिलान्यास गर्नुभएको छ । गाउँपालिकाले आगामी आर्थिक वर्षभित्र सक्ने गरी पालिकाकै रकमबाट ६ वटा वडा कार्यालय र ६ वटा स्वास्थ्य इकाईको भवन निर्माण गर्न लागेको गाउँपालिका अध्यक्ष उप्रेतीले जानकारी दिनुभएको छ ।
गाउँपालिकाले वडा नम्बर १, २, ५, ६, ७ र ९ नम्बर वडाको भवन निर्माण गर्न ठेकेदार कम्पनिसँग सम्झौता गरिसकेको छ । आफ्नै भवनको अभावमा वडा कार्यालयहरु भाडाको घरमा सञ्चालन भइरहेको छ । अढाई तल्लाको संरचना ८५ देखि ९० लाखको दरले निर्माण गर्न निर्माण कम्पनिसँग सम्झौता भएको छ । मनहरी गाउँपालिकाको १ नम्बर वडा कार्यालय विक्रमपर्तामा, २ नम्बर वडा कार्यालय भुन्द्रुङटाँडीमा, ५ नम्बर वडा कार्यालय बसन्तपुरमा, ६ नम्बर वडा कार्यालय सुनाचुरीमा, ७ नम्बर वडा कार्यालय बिजौनामा र ९ नम्बर वडा कार्यालय ज्यामिरेमा बनाउन लागेको छ । वडा नम्बर ३ र वडा नम्बर ९ को कार्यालय भने साविकको हाँडीखोला र मनहरी गाउँपालिकाको भवन भएकोले सोही भवनबाट वडा कार्यालय सञ्चालन गर्न सहज भएकोले नयाँ नबनाइने गाउँपालिका अध्यक्ष उप्रेतीले स्पष्ट पार्नुभएको छ ।
गाउँपालिकाको ९ वटा वडा मध्ये वडा नम्बर ४ मा भने जग्गाको व्यवस्थापन हुन बाँकी भएकोले भवन निर्माणको प्रक्रिया सुरु हुन सकेको छैन । ६ वटा वडा कार्यालय भवन मध्ये एउटा भवनका लागि जिल्ला समन्वय समितिको आर्थिक सहयोग रहेको छ । यस्तै गाउँपालिकाले वडा नम्बर १, २, ४, ५, ८ र ९ नम्बर वडामा स्वास्थ्य चौकी भवन निर्माणका लागि टेण्डरको प्रक्रियामा रहेको छ । गाउँपालिकाको वडा नम्बर ३ मा स्वास्थ्य चौकी र वडा नम्बर ७ मा प्राथमिक स्वास्थ्य केन्द्र रहेको छ । आगामी आर्थिक वर्षमा प्राथमिक स्वास्थ्य केन्द्रलाई १५ सैय्याको अस्पतालमा विकास गरिने पनि गाउँपालिका अध्यक्ष उप्रेतीले स्पष्ट पार्नुभएको छ ।