हेटौंडाः मकवानपुरमा रहेको भीमफेदी प्राथमिक अस्पतालमा जाडो सुरु भएसँगै उपचारका लागि आउने बिरामीको चाप कम भएको छ । गाउँपालिका पहाडी क्षेत्रमा पर्ने र जाडो हुने कारणले अस्पतालमा बिरामीको चाप कम भएको अस्पतालकी मेडिकल अधिकृत डा. पूजा यादवले जानकारी दिनुभयो ।
डा. यादवका अनुसार अस्पतालमा गर्मी महिनामा दैनिक औसत ४० जना बिरामी उपचारका लागि आउने गरेकोमा अहिले दैनिक २५ देखि ३० जना बिरामी आउने गरेका छन् । प्राथमिक अस्पतालबाट डा. यादवले सेवा दिनुहुन्छ भने सहयोगका लागि ३ जना सहयोगी रहेका छन् । अस्पतालमा एक जना डाक्टरले मात्र सेवा दिन नभ्याउने र जनशक्तिको अभाव रहेको डा. यादवले बताउनुभयो ।
गाउँपालिकाका बासिन्दाहरुको बीमा भएका कारण अस्पतालमा उपचारका लागि आउने बिरामीको संख्या वृद्धि भएको छ । डा. यादवका अनुसार अस्पतालले ओपीडी, एमएसएस, गर्भपतन, डेलिभरी, बीमालगायतका सेवा प्रदान गर्ने गरेको छ । गाउँपालिकाको अस्पतालमा अन्य पालिकाका बिरामी फाट्टफुट्ट आउने गरेका छन् । अस्पतालमा ४० वर्षमाथिका बिरामी धेरै आउने गरेको डा. यादवले बताउनुभयो ।
गाउँपालिकाको स्वास्थ्य शाखामा एउटा एम्बुलेन्स रहेको छ । अहिलेको समयमा बिरामीहरुमा रुघाखोकी, पखाला तथा बान्ताजस्ता समस्या देखिने गरेको छ । पालिकाको अस्पतालमा जाँच गर्न आउने सेवाग्राहीमा धेरै उच्च रक्तचाप, खाना विषाक्तता, मधुमेह, दुर्घटनालगायतका समस्यासमेत देखिने डा. यादव बताउनुहुन्छ । पालिकाका बासिन्दाहरुले सिधै धाराको पानी खाने गरेकाले धरै बिरामीहरुमा पानी संक्रमणको समस्या देखिने उहाँले बताउनुभयो ।
अस्पतालले रिफर गर्नुपर्ने बिरामीलाई हेटौंडा अस्पताल, भरतपुर अस्पताल, टिचिङ अस्पताल तथा बिरामीको स्वेच्छाको अस्पतालमा रिफर गर्ने गरेको छ । डा. यादवका अनुसार बिरामीहरु पुनः जाँचका लागि समेत आउने गरेका छन् । भीमफेदी गाउँपालिकामा प्राथमिक अस्पतालका साथै ८ वटा स्वास्थ्यचौकी रहेको छ । गाउँपालिकाका स्वास्थ्य शाखा प्रमुख रामनाथ थिङका अनुसार पालिकाले यस वर्षसम्म अस्पताल सञ्चालनमा ल्याउने भएको छ । अस्पतालको भवन अन्तिम चरणमा आइपुगेको छ भने भित्रको पेन्टिङ र डेकोरेसन गर्न बाँकी रहेको उहाँले बताउनुभयो ।
