हेटौंडाः मकवानपुर जिल्ला खेलकुद विकास समितिले हेटौंडामा आयोजना गर्न लागेको खेलकुद तथा व्यापार महोत्सवको तयारी सुरु भएको छ । सोमबार मकवानपुर जिल्ला खेलकुद विकास समितिको कार्यालय परिसरमा महोत्सवसम्बन्धी विभिन्न निर्णय गरिएको हो ।
मकवानपुर जिल्ला खेलकुद विकास समिति र औद्योगिक शान्ति संस्था नेपालको आयोजनामा आगामी पुस ५ गतेदेखि १७ गतेसम्म खेलकुद व्यापार महोत्सव हुनेछ । बैठकमा १४ वटा खेलकुद संघका पदाधिकारीहरुको उपस्थितिमा विभिन्न निर्णय गरिएको छ ।
मकवानपुर जिल्ला खेलकुद विकास समितिका अध्यक्ष वेश खड्गीको संयजकत्वमा १ सय १ सदस्यीय महोत्सव मुल आयोजक समिति बनाइने निर्णय बैठकले गरेको छ । महोत्सवमा हुने प्रतियोगिताका लागि जिल्ला खेलकुद विकास समितिका कार्यालय प्रमुखको संयोजकत्वमा विभिन्न खेल संघका पदाधिकारी सदस्य रहने निर्णय गरिएको छ ।
यस्तै, महोत्सवमा विभिन्न खेलहरुका पूर्वअध्यक्षहरुको पनि सहभागिता रहने बताइएको छ । महोत्सव आयोजनाका लागि एभरेष्ट बैंकमा वेश खड्गी र शोभा घिमिरेको संयुक्त दस्तखत रहने गरी खाता सञ्चालन गरिने निर्णय भएको बताइएको छ । बैठकले महोत्सवमा आयोजना हुने विभिन्न खेलका लागि संयोजक र मिति तोकेको छ ।
महोत्सवअन्तर्गत् एथ्लेटिक्स खेल प्रभाकर पाण्डेको संयोजकत्वमा पुस ५ गते हुनेछ । कराँते सुनिल खड्कीको संयोजकत्वमा पुस ५ गते हुनेछ भने मकवानपुर जिल्ला तेक्वान्दो कार्यसमितिका सचिव विक्रम लामिछानेको संयाेजकत्वमा पुस ९ गते तेक्वान्दो खेल हुनेछ ।
यस्तै, केवल बानियाँको संयोजकत्वमा ब्याडमिन्टन खेल आयोजना हुनेछ । विश्वनाथ पाठकको संयोजकत्वमा पुस ११ र १२ गते उसु खेलको आयोजना गरिने निर्णय बैठकले गरेको छ । यस्तै, प्रकाश माझीको संयोजकत्वमा आइटीएफ, आशीष थापाको संयोजकत्वमा फुटबल, सुनिल लोप्चनको संयोजकत्वमा रेसलिङ, सन्तोष श्रेष्ठको संयोजकत्वमा भलिबल, मनोज सर्माको संयोजकत्वमा हक्की खेल आयोजना हुनेछ । अनिल दहालको संयोजकत्वमा बक्सिङ, किशोर श्रेष्ठको संयोजकत्वमा फुल कन्ट्रयाक्ट कराँते, सुमन नेपालीको संयोजकत्वमा कबड्डी र करन महत्रा क्षेत्रीको संयोजकत्वमा क्रिकेट आयोजना गरिने निर्णय गरिएको छ ।
