हेटौंडाः हेटौंडा उपमहानगरपालिकाले १९ वटै वडालाई ३२ करोड ९० लाखको बजेट सिलिङ पठाएको छ । आगामी आर्थिक वर्ष २०७७/७८ को लागि योजना छनोट गरी बजेट बनाएर पेश गर्न सिलिङ पठाएको हेटौंडा उपमहानगरपालिकाका आर्थिक प्रशासन शाखा प्रमुख मनोज सुवेदीले बताउनुभयो ।
उपमहानगरपालिकाले वडा नम्बर १, २, ४, ५, ६, ७, ८, ९, १०, ११ लाई १ करोड ५५ लाखको सिलिङ पठाएको छ । त्यस्तै वडा नम्बर ३, १२, १३, १४, १५, १६, १७ लाई भने १ करोड ८० लाखको सिलिङ पठाएको हो । वडा नम्बर १८ मा २ करोड ५० लाख र वडा नम्बर १९ मा भने २ करोड ३० लाखको बजेट सिलिङ पठाइएको आर्थिक प्रशासन शाखाका प्रमुख सुवेदीले जानकारी दिनुभयो ।
चालु वर्षमा हेटौंडा–१, ३, १२, १४, १५, १६ र १७ लाई १ करोड ८० लाख बजेट विनियोजन भएको थियो । त्यस्तै वडा नम्बर २, ४, ५, ६, ७, ८, ९, १०, ११, लाई चालु आव २०७६/७७ मा १ करोड ५५ लाख बजेट विनियोजन भएको थियो । वडा नम्बर १३ लाई भने १ करोड ८५ लाख बजेट विनियोजन गरिएको थियो भने वडा नम्बर १८ लाई २ करोड ५० लाख वडा नम्बर १९ लाई २ करोड ३० लाख बजेट विनियोजन गरेको थियो ।
हेटौंडा उपमहानगरपालिकाले अगामी आर्थिक वर्षमा आफ्नो आम्दानी घट्ने भएपनि वडाहरुको बजेट कटौती नगर्ने भएको छ । ‘गत वर्षको भन्दा बजेट नघट्ने गरी बजेट सिलिङ पठाइएको छ’, सुवेदीले भन्नुभयो । चालु आर्थिक वर्षमा हेटौंडा उपमहानगरपालिकाको आन्तरिक राजस्व आम्दानी घट्ने, लकडाउनले गर्दा ढुंगा, गिट्टी बालुवाको कर कम उठ्ने भएको छ । आगामी आर्थिक वर्षका लागि हेटौंडा उपमहानगरपालिकालाई संघीय सरकारले वित्तीय समानीकरणतर्फ ३२ करोड ७५ लाख र सशर्त अनुदान तर्फ ६६ करोड ४३ लाख विनियोजन गरेको छ । गत आर्थिक वर्ष संघीय सरकारले हेटौंडा उपमहानगरपालिकालाई वित्तीय समानीकरणतर्फ ३३ करोड ९५ लाख बजेट विनियोजन गरेको थियो भने सशर्ततर्फ ५१ करोड ५९ लाख बजेट विनियोजन गरेको थियो ।
संघीय सरकारले पनि आगामी वर्षका लागि चालु वर्षको भन्दा वित्तीय समानीकरणतर्फ साढे ५ करोड अनुदान घटाएर पठाएको हेटौंडा उपमहानगरपालिकाका मेयर हरिबहादुर महतले जानकारी दिनुभयो । त्यस्तै अगामी आर्थिक वर्षमा भने सशर्त अनुदान केही बढेर आएको मेयर महतले बताउनुभयो । अगामी वर्षमा तलब बढ्ने, नयाँ स्वास्थ्य सम्बन्धी कार्यक्रमहरु पनि थप भएर आएको उहाँले बताउनुभयो । यसकारण सशर्त अनुदानमा केही रकम बढेर आएको उहाँले बताउनुभयो । आर्थिक शाखा प्रमुख सुवेदीका अनुसार स्रोत अनुदान तथा बजेट बाँडफाँड समितिले गत वर्षकै तुलनामा वडाहरुलाई बजेट सिलिङ पठाएको बताउनुभयो । हेटौंडा उपमहानगरपालिकाले बजेट सम्बन्धी अभ्यास गरिरहेको र अहिले नै कति रकमको बजेट आउने भन्ने बारे भन्न नसकिने उहाँले बताउनुभयो ।
हेटौंडा उपमहानगरपालिको चालु वर्षका लागि १ अर्ब ८१ करोड १८ लाखको बजेट ल्याएको थियो । जसमध्ये संघीय सरकारले ८५ करोड ५४ लाख, बागमती प्रदेश सरकारले ८ करोड ३४ लाख ९९ हजार र आन्तरिक स्रोतबाट ८७ करोड २९ लाख १ हजार जुटाएको थियो । चालु वर्षमा भने आन्तरिक राजश्वमा कमी आउने देखिएको छ । यस्तै बजेट सम्बन्धी हेटौंडा उपमहानगरपालिकाले विषयगत बजेटहरु ‘बजेट तर्जुमा समितिमा’ छलफल चलिरहेको छ । हेटौंडा उपमहानगरपालिकाले आफ्ना १९ वटै वडालाई सिलिङ पठाएर जेठ ३१ गतेसम्म योजना पेश गर्न भनेको छ । हेटौंडा उपमहानगरपालिकाले आउँदो महिना असारको १० गते पूर्ण बजेट ल्याउने भएको आर्थिक प्रशासन प्रमुख मनोज सुवेदीले जानकारी दिनुभयो । यसअघि संघले जेठ १५ गते बजेट ल्याएको थियो भने बागमती प्रदेश सरकारले आउँदो असार १ गते बजेट ल्याउने भएको छ ।
