हेटौंडाः हेटौंडा–१ स्थित सञ्चो अस्पतालका डाक्टरलाई कुटपिट गरिएको घटनामा संलग्न रहेकामध्ये थप एक जनालाई प्रहरीले पक्राउ गरेको छ । प्रहरीले हेटौंडा–१२, सिग्रेनीका ४० वर्षीय सुनिल पाख्रिनलाई बुधबार हेटौंडा–९, सिमेन्ट रोडबाट पक्राउ गरेको हो ।
पाख्रिनसँगै पक्राउ पर्नेको संख्या ५ जना पुगेको छ । यसअघि प्रहरीले घटनामा संलग्न रहेका हेटौंडा–१२ की रमा प्रधान, रमिला प्रधान, रोहन प्रधान र अनुप प्रधानलाई गत बिहीबार नै पक्राउ गरेको थियो । जिल्ला अदालतले पक्राउ परेकाबाहेक घटनामा संलग्न थप ५ जनाको नाममा आइतबार पक्राउ पुर्जी जारी गरेको थियो । पक्राउ पुर्जी जारी भएकाहरुको खोजी कार्य भइरहेको जिल्ला प्रहरी कार्यालय मकवानपुरका प्रहरी नायब उपरीक्षक लक्ष्मी भण्डारीले जानकारी दिनुभयो । गत बुधबार हेटौंडा–१ स्थित सञ्चो हस्पिटलमा बिरामीको उपचार गरिरहेका चिकित्सक जनरल फिजिसियन डा. विकास थापा र एनेस्थेसिया डा. प्रशान्त विडारीमाथि सांघातिक आक्रमण भएको थियो ।
