हेटौंडाः मकवानपुर जिल्लाको हेटौंडा उपमहानगरपालिका–१८, हर्नामाडीस्थित ज्योति माविले निजीश्रोतमा कार्यरत अंग्रेजी माध्यमतर्फक शिक्षक तथा कर्मचारीको जीवन बीमा गरिदिएको छ ।
विद्यालयले १६ जना शिक्षक, कर्मचारीको विद्यालयकै आयस्रोतमा प्रतिव्यक्ति एक लाख रुपैयाँ बराबरको शुभारम्भ जीवन वीमा, दुर्घटना, पुर्ण अंगभंगसहित ६ वटा अतिरिक्त सुबिधासहितको जीवन बीमा गरिएको विद्यालय व्यवस्थापन समितिका अध्यक्ष हर्क रम्तेलले जानकारी दिनुभयो । सिटिजन लाइफ इन्स्योरेन्स कम्पनिमा बीमा गरिएको हो । शिक्षक, कर्मचारीको बीमाका लागि विद्यालयका सहायक प्रधानाध्यापक भुपेन्द्र चौलागाईंले ५५ हजार पाँच सय ५५ रुपैयाँ र अङ्ग्रेजी माध्यमका संयोजक आशिष चौलागाईले ३३ हजार तीन सय ३३ रुपैयाँ योगदान गर्नुभएको थियो ।
बीमा कम्पनिका क्षेत्रीय प्रमुख शिवकुमार कार्की, राजेश आचार्य र विद्यालयका व्यवस्थापन समिति अध्यक्ष हर्क रम्तेल, सदस्य बिमला बिसुन्खे, प्रधानाध्यापक जयराम थापा एवम् सहायक प्रधानाध्यापक भुपेन्द्र चौलागाईं र अंग्रेजी माध्यम संयोजक आशिष चौलागाईंको सहभागितामा बीमालेख हस्तान्तरण कार्य भएको थियो । २०२४ सालमा स्थापना भएको विद्यालयमा १२ कक्षासम्म पठनपाठन भइरहेको छ । बीमा कार्यक्रमले शिक्षक, कर्मचारीको मनोवल बढ्ने र त्यसले विद्यालयको शैक्षिक गुणस्तरमा सुधार गर्न सहयोग पुग्ने विद्यालय व्यवस्थापन समितिका अध्यक्ष हर्क रम्तेलको भनाइ छ ।
