सिन्धुलीः सिन्धुली जिल्लाको हरिहरपुरगढी गाउँपालिका–१, ककरेका पहिरो प्रभावित परिवारलाई बागमती प्रदेश सरकारका आन्तरिक मामिला तथा कानूनमन्त्री गंगानारायण श्रेष्ठले भेट्नु भएको छ ।
आइतबार पीडित परिवारलाई भेटेर केही दिनभित्र बागमती प्रदेश सरकारको तर्फबाट २ लाख रुपैयाँ र नेपाल सरकारको तर्फबाट ५ लाख रुपैयाँ गरी जम्मा ७ लाख रुपैयाँ उपलब्ध गराउने प्रतिवद्धता जनाउनुभएको छ ।
यही साउन २२ गते राती मकवानपुर जिल्लाको बागमती गाउँपालिका–५, सिक्रे दोभानको पहिरोमा परी चार जनाको मृत्यु भएको थियो भने दुईजना अझै बेपत्ता रहेका छन् । पहिरोमा परी गत मंगलबार बिहान आएको पहिरोमा परी ५५ वर्षीया सन्तमाया स्याङ्तान, ६० वर्षीय अक्कल बहादुर स्याङ्तान, २३ वर्षीया शीला स्याङ्तान र ७ महिने शिशु दिव्या पहरीको मृत्यु भएको थियो । २६ वर्षीय जीवन पहरी र ३ वर्षे देव पहरी अझै बेपत्ता छन् । यस्तै पहिरोमा परी १७ वर्षीय पासाङ घिसिङ घाइते भएका छन् । घिसिङको हेटौँडा अस्पतालमा उपचार भइरहेको छ ।
मन्त्री श्रेष्ठले आइतबार परिवारलाई भेटी मृतकप्रति श्रद्धाञ्जली अर्पण गर्नुका साथै परिवारजनमा समवेदना व्यक्त गर्नुभयो । काजकिरियाका लागि मृतकका परिवारलाई उहाँले व्यक्तिगत तर्फबाट १० हजार रुपैयाँ प्रदान गर्नुभएको छ । यस्तै नेपाल रेडक्रस सोसाइटी सिन्धुली जिल्ला शाखा र उद्योग वाणिज्य संघ सिन्धुलीले ४४ हजार रुपैयाँ बराबरको खाद्य र गैरखाद्य सामग्री सहयोग उपलब्ध गराएको छ ।
