हेटौँडाः मकवानपुर प्रहरीले लागुऔषध गाँजासहित दुईजना भारतीय नागरिकलाई पक्राउ गरेको छ । पक्राउ पर्नेमा भारतीय बीआर ०१ बीए २०६९ नम्बरको कार चालक विहारका २३ वर्षीय नितेश कुमार र कारमा सवार सोही ठाउँका २५ वर्षीय रितेश कुमार रहेको जिल्ला प्रहरी कार्यालय मकवानपु्रका प्रहरी प्रवक्ता टेक बहादुर कार्कीले जानकारी दिनुभयो ।
आइतबार बिहान ९ बजेर ५० मिनेटको समयमा पूर्व–पश्चिम राजमार्गअन्तर्गत हेटौँडा–१५, रातोमाटेस्थित प्रहरी चौकीबाट प्रहरीले चितवनबाट वीरगञ्जतर्फ जाँदै गरेको कारलाई सुरक्षाजाँच गर्दा १७ किलो ५ सय ग्राम गाँजा फेला पारेको थियो । लागुऔषध गाँजासहित दुवै जनालाई पक्राउ गरेर अहिले थप अनुसन्धान गरिरहेको प्रहरी प्रवक्ता कार्कीले बताउनुभयो ।
