हेटौँडाः मकवानपुर जिल्लाको बागमती गाउँपालिका–५ सिक्रे दोभानमा पहिरोमा परी एक जनाको मृत्यु भएको छ । मंगलबार बिहान पहिरोमा परी ५५ वर्षीया सन्तमाया स्याङ्तानको मृत्यु भएको प्रहरीले जानकारी दिएको छ ।
मंगलबार बिहान करिव ४ बजेको समयमा पहिरोले अक्कल बहादुर स्याङ्तानको घर बगाएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक टेक बहादुर कार्कीले जानकारी दिनुभयो । पहिरोमा परी २ बालबालिकासहित ६ जना बेपत्ता रहेको प्रहरीले जानकारी दिएको छ । पहिरोमा परी अन्दाजी ६० वर्षीय अक्कल बहादुर स्याङ्तान, २२ वर्षीया शिला पहरी, २५ वर्षीय जीवन पहरी हराइरहेको प्रहरीले जनाएको छ ।
यसैगरी ४ वर्षीय मिलन पहरी, आन्दाजी डेढ वर्षीया दिव्या पहरी बेपत्ता छन् । सिन्धुली जिल्ला हरिहरपुर गाउँपालिका–१ कोकटीका आन्दाजी १६/१७ वर्षीय पासाङ घिसिङ (पाहुना लागि बास) पनि बेपत्ता रहेका छन् । जिल्ला प्रहरी कार्यालय मकवानपुरका प्रहरी नायव उपरीक्षक कार्कीअनुसार उक्त स्थलमा प्रहरी सहायक निरीक्षक भीमबहादुर केसीको कमान्डमा खोजी कार्य भइरहेको छ । वर्षाका कारण हेटौँडाबाट काठमार्डौं जोड्ने सडकहरु अबरुद्ध भएका छन् भने कतिपयस्थान डुबानमा परेको छ ।
