हेटौंडाः माध्यमिक शिक्षा परीक्षा (एसईई) को ग्रेडवृद्धि परीक्षाका लागि आवेदन दिने समय सकिएको छ । शिक्षा विकास तथा समन्वय इकाई मकवानपुरका अधिकृत उन्नति ढकालले आइतबारसम्म आवेदन दिने अन्तिम समय रहेको जानकारी दिनुभयो । आज सोमबारदेखि परीक्षाको तयारीमा लाग्ने उहाँले बताउनुभयो ।
आउँदो साउन २६ गते र २७ गते देशभर एसईई ग्रेडवृद्धि परीक्षा सञ्चालन हुनेछ । करिब एक महिनाअघि सार्वजनिक एसईई नतिजामा सीभन्दा न्यून ग्रेड प्राप्त गरेका विद्यार्थीले दुईवटा विषयमा मात्र ग्रेडवृद्धि परीक्षा दिन मिल्ने गरी परीक्षा आवेदन फारम खुलाइएको थियो ।
एसईईको ग्रेडवृद्धि परीक्षा आउन ४ दिनमात्र बाँकी रहेको छ । तर, हालसम्म कति विद्यालयका विद्यार्थीले आवेदन फारम भरे भन्ने यकिन नभएको अधिकृत ढकालले बताउनुभयो । परीक्षाका लागि परीक्षा केन्द्र र केन्द्राध्यक्षसमेत तोकिएको छैन । उक्त परीक्षालाई हतारको परीक्षाको रुपमा लिन सकिने उहा“को भनाइ छ । समयमै विद्यार्थी संख्या यकिन नहुँदा प्रश्नपत्र छपाईमा समेत समस्या हुनसक्ने बताइएको छ । मकवानपुरमा एक सय ३८ माध्यमिक तहका विद्यालय रहेको छ ।
