हेटौँडाः १६ वर्ष उमेर समूहको राष्ट्रिय फुटबल टिममा मकवानपुरको उपस्थिति शून्य हुने भएको छ । राष्ट्रिय टिम तयार पार्ने गरी अखिल नेपाल फुटबल संघ (एन्फा) ले देशभरबाट छनोट गर्ने क्रममा ३२ सदस्यीय सूचिमा आइपुग्दा मकवानपुरको उपस्थिति शून्य भएको हो ।
यसअघि ५८ जनाको सूचिमा मकवानपुरका एरोन गुरुङ अटाएका थिए । शुक्रबार एन्फाले सार्वजनिक गरेको ३२ जनाको सूचिमा एरोन अटाउन सकेनन् । ३२ जनाको सूचि सार्वजनिक हुने क्रममा मकवानपुरको उपस्थिति शून्य भएको हो । एन्फाले ३२ जनालाई बन्द प्रशिक्षणमा राखेर राष्ट्रिय टिमको अन्तिम सूचि तयार पार्नेछ ।
मकवानपुर जिल्लाबाट प्रदेशस्तरीय छनोटमा सहभागी हुन जिल्लाबाट २७ जना छानिएका थिए । जिल्लामा छनोटमा एक सय ९२ जना किशोर खेलाडी सहभागी थिए । जिल्लाबाट सहभागी २७ जनामध्ये प्रदेशस्तरीय छनोटबा १२ जना राष्ट्रियस्तरको छनोटमा सहभागी भएका थिए । मकवानपुरबाट एरोन गुरुङ, रवि थिङ, पवन दर्लामी, विकल राना मगर, लिसन गुरुङ, रिजन जिसी, असन प्रजा, प्रमित खत्री, उप्रान्त आले, रोशन गोले, प्रनिष भण्डारी र अमित स्याङ्तान प्रदेशस्तरीय छनोट पार गरी राष्ट्रिय छनोटमा सहभागी भएका थिए ।
उमेर समूहको राष्ट्रिय टिममा सहभागिताले भविष्यमा सिनियर राष्ट्रिय टिममा जिल्लाको प्रतिनिधित्व गर्ने आधार तय हुने भएकोले चासोका साथ हेरिएको थियो । अहिले राष्ट्रिय टिमको प्रारम्भिक बन्द प्रशिक्षणमा मकवानपुरबाट ६ जना सहभागी छन् । राष्ट्रिय टिममा नियमितरुपमा ३ देखि ५ जना खेलाडी समावेश गराउँदै आएको मकवानपुर जिल्लाले उमेर समूहमा राष्ट्रिय टिममा आफ्नो उपस्थिति सावित गर्न नसक्नु चनौतिको विषय समेत हो ।
१६ वर्ष उमेर समूहमा ए डिभिजन क्लबले समेत टिम तयार पारेकोले मकवानपुरका खेलाडीको उपस्थितिमा कठिनाइ भएको मकवानपुर जिल्ला फुटबल संघका महासचिव छवि सुवेदीको भनाइ छ । एन्फाले अहिले तयार पारेको यु–१६ राष्ट्रिय टिमले दक्षिण एसियाली यु–१६ फुटबल प्रतियोगितामा सहभागिता जनाउने छ । यु–१६ फुटबल प्रतियोगिता आगामी भदौ १५ देखि २५ गतेसम्म भुटानमा आयोजना हुँदैछ ।
