हेटौँडाः पूर्व–पश्चिम राजमार्गअन्तर्गत हेटौँडा–१५, रातोमाटेस्थित प्रहरी चेकपोष्टबाट मकवानपुर प्रहरीले १ हजार ५ सय एम्पुल विभिन्न लागुऔषधसहित एकजनालाई पक्राउ गरेको छ । पक्राउ पर्नेमा धनुषा जिल्लाका १८ वर्षीय सागिर खान रहेको प्रदेश प्रहरी कार्यालय हेटौँडाले जानकारी दिएको छ ।
बिहिबार राती ११ बजेर ३० मिनेटको समयमा वीरगञ्जबाट काठमाडौँ जाँदै गरेको बा प्र ०३–००१ ख २३९८ नम्बरको यात्रु बाहक बसलाई सुरक्षाजाँच गर्दा बसको डिक्कीमा रहेको झोलामा लागुऔषध फेला परेको प्रहरीले जनाएको छ । झोलाबाट डाईजेपाम ५ सय एम्पुल, नोर्फिन ५ सय एम्पुल र फेनार्गन ४ सय ९८ एम्पुल बरामद भएको प्रहरीले जनाएको छ । लागुऔषधसहित बसका सहचालक खानलाई नियन्त्रणमा लिई थप अनुसन्धान भइरहेको प्रहरीले जानकारी दिएको छ ।
