हेटौंडाः जिल्ला खेलकुद विकास समिति मकवानपुरले यु–१६ फुटबल खेलाडी छनौटअन्तर्गत् प्रदेशमा छनौट भएका १२ जना खेलाडीहरुलाई खेल सामग्री वितरण गरेको छ । सोमबार एक कार्यक्रमको आयोजना गर्दै जिल्ला खेलकुद विकास समितिले १२ जना खेलाडीलाई एक–एक थान बुट र जुराफ वितरण गरेको हो ।
दोस्रो चरणमा प्रदेशमा छनौट भएका १२ जना खेलाडीहरु काठमाडौंको एन्फा कम्प्लेक्समा आज मंगलबारबाट साउन २० गतेसम्म हुने अन्तिम तथा राष्ट्रियस्तरको छनौट चरणमा सहभागी हुँदैछन् । प्रदेशमा छनौट भएका खेलाडीहरुलाई बधाई दिनुहुँदै जिल्ला खेलकुद विकास समितिका अध्यक्ष वेश खड्गीले धैर्यतापूर्वक छनौट खेल खेल्न आग्रह गर्नुभयो ।
मकवानपुरबाट एरोन गुरुङ, रवि थिङ, पवन दर्लामी, विकल राना मगर, लिसन गुरुङ, रिजन जिसी, असन प्रजा, प्रमित खत्री, उप्रान्त आले, रोशन गोले, प्रनिष भण्डारी र अमित स्याङ्तान प्रदेशस्तरीय छनोट पार गर्न सफल भएका छन् । कार्यक्रममा बागमती खेलकुद विकास परिषद्का सदस्य माधव तिमल्सिना, जिल्ला खेलकुद विकास समितिका कार्यालय प्रमुख माधव कोइराला र जिल्ला फुटबल संघका उपाध्यक्ष युवराज लामालगायतको उपस्थिति रहेको थियो ।
