हेटौंडाः हेटौंडा–१, चौकीटोलकी एक महिलालाई कोरोना भाइरस संक्रमण पुष्टि भएको छ । हेटौंडास्थित प्रयोगशालामा गरिएको परीक्षणमा २५ वर्षीया महिलामा कोरोना भाइरसको संक्रमण पुष्टि भएको हेटौंडा अस्पतालका डा. हरिबहादुर खड्काले जानकारी दिनुभयो । उहाँका अनुसार जेठ ९ गते हेटौंडा अस्पतालको ज्वरो क्लिनिकमा परीक्षण गर्दा कोरोना भाइरसको लक्षण देखिएपछि स्वाब संकलन गरी परीक्षणका लागि पठाइएको थियो ।
आज बिहान ती महिलामा कोरोना भाइरसको संक्रमण पुष्टि भएसँगै उनलाई उपचारका लागि चितवन जिल्लाको भरतपुरस्थित अस्थायी कोरोना अस्पताल पठाइएको डा. खड्काले बताउनुभयो । कोरोना संक्रमित महिलाको घर हेटौंडा–१, चौकीटोल भए पनि उनी चितवन जिल्लाको भरतपुर उपमहानगरपालिका बस्दै आएकी थिइन् । उनी जेठ ९ गते नै हेटौंडा आएको जानकारी प्राप्त भएको डा. खड्काले बताउनुभयो ।
कोरोना संक्रमति पहिचान भएपछि आवश्यक कार्य गर्न अहिले विश्व स्वास्थ्य संगठनका चिकित्सक, हेटौंडा अस्पतालका चिकित्सक, सुरक्षा निकायसँग आवश्यक तयारीबारे छलफल सुरु भएको हेटौंडा उपमहानगरपालिकाकी उपमेयर मीनाकुमारी लामाले जानकारी दिनुभएको छ ।
