हेटौंडाः राष्ट्रिय परीक्षा बोर्डले २०७९ सालको माध्यमिक शिक्षा परीक्षा (एसईई) को नतिजा सार्वजनिक गरेको एक साता भएको छ । गत बिहीबार सार्वजनिक गरिएको एसईई परीक्षाको नतिजाको विवरण मकवानपुर जिल्लाको ५ वटा पालिकाले सार्वजनिक गरेका छैनन् । जिल्लाका एक उपमहानगरपालिका, एक नगरपालिका र ८ वटा गाउँपालिकामध्ये ५ वटा गाउँपालिकाले मात्र एसईईको समष्टिगत नतिजा सार्वजनिक गरेका छन् ।
भीमफेदी, मनहरी, बकैया, कैलाश र मकवानपुरगढी गाउँपालिकाले पालिकाभित्र रहेका विद्यालयबाट कति जना विद्यार्थीले कति जीपीए प्राप्त गरे भन्ने विवरण सार्वजनिक गरेको छ । गाउँपालिकाहरुले सामाजिक सञ्जालमार्फत् एसईईको नतिजा विवरण सार्वजनिक गरेका छन् । परीक्षाको नतिजा प्रकाशन एक सातासम्म पनि हेटौँडा उपमहानगरपालिका, थाहा नगरपालिका, इन्द्रसरोवर गाउँपालिका, राक्सिराङ गाउँपालिका र बागमती गाउँपालिकाले पालिकाका विद्यालयहरुको एसईईको नतिजा विवरण सार्वजनिक गरेको छैन । सार्वजनिक नतिजाअनुसार मकवानपुर जिल्लाका गाउँपालिकाहरुमा उच्च जीपीए ल्याउने विद्यार्थी संख्या न्यून रहेको छ ।
हेटौँडा उपमहानगरपालिकाको शिक्षा विकास महाशाखा प्रमुख गंगाधर रिमालले उपमहानगरभित्र रहेका विद्यालयबाट कति विद्यार्थीले कुन जीपीए प्राप्त गरे भन्ने विवरण सार्वजनिक नगरेको स्वीकार गर्नुभयो । माध्यमिक तहका विद्यालयबाट कति विद्यार्थी परीक्षामा सहभागी भए र कति–कति जीपीए प्राप्त गरे भन्ने तथ्यांक जानकारी नभएको उहाँको भनाइ छ । विद्यालयहरुबाट नतिजा विवरण संकलनको क्रममा रहेको र सबै विद्यालयबाट प्राप्त नभइसकेको उहाँले जानकारी दिनुभयो । हेटौँडा उपमहानगरभित्र २९ वटा माध्यमिक तहका सामुदायिक विद्यालय छन् ।
इन्द्रसरोवर गाउँपालिका शिक्षा शाखा प्रमुख धर्मानन्द पन्तले पालिकाले एसईईको नतिजाको तथ्यांक राख्ने नगरेको बताउनुभयो । पालिकाभित्र ५ वटा माध्यमिक तहका विद्यालय छन् । विद्यालयबाट एसईईमा सहभागी विद्यार्थीको परीक्षाको नतिजा तथ्यांक गाउँपालिकासँग छैन । बागमती गाउँपालिका शिक्षा शाखा प्रमुख प्रमोद प्रतीक राईका अनुसार ६ वटा माध्यमिक तहको विद्यालय रहेका छन् । हालसम्म पालिकाको एसईई परीक्षाको नतिजाको विवरण सार्वजनिक भएको छैन । राक्सिराङ गाउँपालिका र थाहा नगरपालिकाले पनि एसईई परीक्षाको नतिजाको तथ्यांक सार्वजनिक गरेको पाइएको छैन ।
मकवानपुर जिल्लाको मकवानपुरगढी गाउँपालिकामा एक जनाले ३.६ भन्दा बढी जीपीए प्राप्त गरेका छन् । ११ जना विद्यार्थीको जीपीए ३.२ देखि ३.६ सम्म रहेको छ भने १९ जनाले २.८ देखि ३.२ जीपीए ल्याएका छन् । यस्तै, २५ जनाले २.४ देखि २.८ जीपीए ल्याउँदा ३२ जनाले २.० देखि २.४ जीपीए ल्याएका छन् । जीपीए १.६ भन्दा बढी र २.० सम्म ल्याउने विद्यार्थी ४२ जना र १.६ जीपीए ल्याउने विद्यार्थी ५१ जना रहेका छन् । एक सय जना विद्यार्थीको नतिजा १.६ जीपीएभन्दा कम रहेको छ । १० वटा माध्यमिक तहका विद्यालयबाट २ सय ८१ जना परीक्षामा सहभागी भएका थिए भने ५ जना अनुपस्थित थिए ।
मकवानपुरको मनहरी गाउँपालिकाबाट ३ दशमलब ६१ देखि ४ जीपीए ल्याउने विद्यार्थीको संख्या ५ जना रहेका छन् । ३ दशमलब २१ देखि ३ दशमलब ६ जीपीए ल्याउने २५ जना, २ दशमलब ८१ देखि ३ दशमलब २ जीपीए ल्याउने ४० जना विद्यार्थी छन् । २ दशमलब ४१ देखि २ दशमलब ८ जीपीए ल्याउने ४३, २ दशमलब १ देखि २ दशमलब ४ जीपीए ल्याउने एक सय १७ जना विद्यार्थी छन् । यस्तै, १ दशमलब ६१ देखि २ जीपीए ल्याउने एक सय ८७ जना, १ दशमलब ६ जीपीए ल्याउने १५ जना र १ दशमलब ६ जीपीएभन्दा कम ल्याउने ५४ जना छन् । पालिकाभित्र रहेका ११ वटा सामुदायिक विद्यालयबाट ४ सय ९२ विद्यार्थीले एसईई परीक्षा दिएका थिए । यस्तै ९ जना विद्यार्थी अनुपस्थित भएका थिए ।
मकवानपुर जिल्लाको बकैया गाउँपालिकामा २ जना विद्यार्थीले ३.६ भन्दा बढी जीपीए ल्याएका छन् । ३.२१ देखि ३.६ सम्म जीपीए ल्याउने विद्यार्थी ११ जना, २.८१ देखि ३.२ जीपीए ल्याउने विद्यार्थी २० जना र २.४१ देखि २.८ जीपीए ल्याउने विद्यार्थी ४९ जना रहेका छन् । बकैयामा एक सय ३६ जना विद्यार्थीको जीपीए २.०१ देखि २.४ आएको छ भने एक सय ८० जनाको जीपीए १.६१ देखि २.० रहको छ । ५९ जना विद्यार्थीको जीपीए १.६ आएको छ भने ५२ जना विद्यार्थीले १.६ भन्दा कम जीपीए ल्याएका छन् । पालिकाभित्र रहेका ११ वटा सामुदायिक विद्यायलबाट ५ सय ९ जना विद्यार्थी परीक्षामा सहभागी भएका थिए ।
मकवानपुर जिल्लाको कैलाश गाउँपालिकाबाट ३.६ देखि ४.० जीपीए प्राप्त गर्ने विद्यार्थीको संख्या शून्य रहेको छ । ३.२ देखि ३.६ जीपीए प्राप्त गर्ने ३ जना, २.८ देखि ३.२ जीपीए प्राप्त गर्ने १२ जना, २.४ देखि २.८ जीपीए प्राप्त गर्ने २८ जना, २.० देखि २.४ जीपीए ल्याउने विद्यार्थी ६७ जना छन् । यस्तै, १.६ देखि २.० जीपीए ल्याउने ७४ जना र १.६ भन्दा कम जीपीए ल्याउने विद्यार्थी १३ जना छन् । सबैभन्दा बढी जीपीए कालिका माध्यमिक विद्यालयका एक विद्यार्थीले ३ दशमलव ४ जीपीए ल्याएका छन् । २ सय ८ जना विद्यार्थीले परीक्षा दिएका थिए भने ११ जना परीक्षामा अनुपस्थित भएका थिए ।
