हेटौंडाः चितवन जिल्लामा आयोजना भएको अन्तरजिल्ला विद्यालयस्तरीय चितवन टी–१० क्रिकेट प्रतियोगिताको उपाधि मकवानपुरको आधुनिक राष्ट्रिय माविले जितेको छ । शनिबार भएको फाइनल खेलमा मकवानपुरकै जीएस निकेतनलाई ४५ रनले हराउँदै आधुनिकले उपाधि जितेको हो ।
टस जितेर व्याटिङ गरेको आधुनिकले जीएसलाई ८५ रनको लक्ष्य दिएको थियो । जीएसले सबै विकेट गुमाउँदै ४० रनमात्र बनायो । मौसम अनुकूल नभएकाले ८ ओभरको मात्र खेल खेलाइएको जीएसका क्रिकेट कोच नवीन मिश्रले बताउनुभयो ।
उपाधिसँगै आधुनिकले १० हजार रुपैयाँसहित शिल्ड, मेडल तथा प्रमाणपत्र प्राप्त गरेको छ भने उपविजेता जीएसले ५ हजार ५ सय रुपैयाँ प्राप्त गरेको छ । फरवार्ड इभेन्ट म्यानेजमेन्ट प्रालिको आयोजनामा भएको प्रतियोगितामा १२ टिम सहभागी रहेका थिए । प्रतियोगितामा मकवानपुर, चितवन र नवलपुरका विद्यालयका टिमहरुको सहभागिता रहेको थियो ।
