हेटौँडाः नगरस्तरीय शैक्षिक समन्वय समिति हेटौँडाले अनिवार्य अवकाश प्राप्त शिक्षकलाई सम्मान गरेको छ । समितिको २५औं साधारण भेलाको अवसरमा शुक्रबार हेटौँडामा शिक्षकहरुलाई सम्मान गरेको हो । २०७५ सालपछि अनिवार्य अवकाश प्राप्त ७७ जना शिक्षकलाई सम्मान गरिएको हो ।
हेटौँडा उपमहानगरपालिकाका उपप्रमुख राजेश बानियाँको प्रमुख आतिथ्य तथा समितिका अध्यक्ष सागरप्रसाद खतिवडाको अध्यक्षतामा अधिवेशनको उद्घाटन कार्यक्रम भएको हो । शिक्षक भेलालाई सम्बोधन गर्नुहुँदै उपप्रमुख बानियाँले शिक्षकको आचरणमाथि प्रश्न उठाउनुभएको छ । उहाँले शिक्षकहरु भट्टीमा भेटिने गरेको, भट्टीमा मदिरा सेवन गर्दै गरेको फोटो सामाजिक सञ्जालमा भेटेको भन्दै शिक्षकको आचरणमाथि प्रश्न उठाउनभुएको छ । सुगममा मात्रै बस्न चाहने शिक्षकको चरित्र ठिक नभएको उहाँको भनाइ थियो ।
आफ्ना सन्तानलाई विदेश पठाउने शिक्षकले यहाँ के शिक्षा दिन्छ भन्दै आक्रोश समेत पोख्नुभयो । आफू युरोप, अमेरिका जहाँ बसे पनि बस्न सक्ने हुँदा हुँदै पनि नेपाल फर्किएको उल्लेख गर्नुहुँदै भन्नुभयो, “कतिपयले आलोचना गर्छन् हेटौँडाका प्रमुख र उपप्रमुखले केही पनि गरेनन् । खै बालेनले जस्तो गरेको भन्छन् । काठमाडौंमा चिप्लेटी र बाँसघारी छ र ? काठमाडौं जस्तो सुगम ठाउँमा काम गर्नु र हेटौँडाको चिप्लेटी र बाँसघारीमा काम गर्न सजिलो छैन ।”
उद्घाटन कार्यक्रममा नगरस्तरीय शैक्षिक समन्वय समितिका सचिव माधव खतिवडाले वार्षिक प्रतिवेदन प्रस्तुत गर्नुभएको थियो भने कोषाध्यक्ष दिनेश उप्रेतीले आयव्यय विवरण प्रस्तुत गर्नुभएको थियो । नगरस्तरीय शैक्षिक समन्वय समितिले हेटौँडा उपमहानगर क्षेत्रका विद्यालयबीच परीक्षा सञ्चालनमा आवश्यक समन्वय गर्दै आएको छ । भेलाले नयाँ समिति चयन गर्नेछ ।
