हेटौंडाः तत्कालिन खानेपानी संस्थानको हेटौंडास्थित शाखालाई स्थानीय बोर्डमा हस्तान्तरण गरेको आज सातौं वर्ष पूरा भएको छ । सातौं वार्षिकोत्सवको पूर्वसन्ध्यामा हिजो बुधबार हेटौंडा खानेपानी व्यवस्थापन बोर्डले एउटा प्रतिवेदन सार्वजनिक गरेको छ । बोर्डले सार्वजनिक गरेको विवरणअनुसार चालु आर्थिक वर्षको बैशाख मसान्तसम्ममा करिब १८ हजार धारा उपभोक्ताका लागि जडान गरेको छ । चालु आर्थिक वर्षमा सात सय ६१ नयाँ धारा जडान गरेको बोर्डले हालसम्म १७ हजार ९ सय ४ वटा धारा उपभोक्ताका लागि जडान गरेको जनाएको छ ।
अहिले बोर्डले दैनिक १ करोड ४१ लाख लिटर पानी वितरण गरिरहेको छ । दैनिक पानीको माग भने १ करोड ६५ लाख लिटर रहेको बोर्डले जनाएको छ । हेटौंडा उपमहानगरपालिका भित्र वडा नम्बर ३, ११, १२, १३, १८ र १९ का बासिन्दाहरुले भने स्थानीयस्तरमा संचालित खानेपानी उपभोक्ता समितिहरुबाट समेत खानेपानी उपभोग गर्दे आइरहेका छन् ।
बोर्डले चालु आर्थिक वर्षमा हेटौंडा–८, कमानेस्थित रोटरी प्राविसँगै निर्माण भएको नयाँ डिप ट्यूवेल संचालनमा ल्याएको जनाएको छ । बोर्डले हेटौंडा उपमहानगरपालिका, वडा कार्यालय तथा विभिन्न संघ संस्था कार्यालयहरुबाट माग भए अनुसार बोर्डको सेवा क्षेत्र बाहिर झण्डै १० किलोमिटर पाइप वितरण गरेको र बोर्डको सेवा क्षेत्र भित्र साढे ६ किलोमिटर जिर्ण पाइप परिवर्तन पाइप लाइन सुधार गरेको जनाएको छ ।
चालु आर्थिक वर्षमा जिल्ला समन्वय समिति मकवानपुर, हेटौंडा उपमहानगरपालिका र हेटौंडा खानेपानी व्यवस्थापन बोर्डको सहलगानीमा हेटौंडा वडा नं. १४ बनेलधापमा ३०० घनमिटरको पानी टंकी लगायत पाइप लाइन विस्तार कार्य भइरहेको पनि जनाएको छ ।
