हेटौँडाः हेटौँडा उपमहानगरपालिकाले मकवानपुर क्रिकेट संघलाई खेलकुद सामग्री प्रदान गरेको छ । आइतबार जिल्ला खेलकुद विकास समिति मकवानपुरको कार्यालयमा एक कार्यक्रमको आयोजना गरी नगर प्रमुख मिना कुमारी लामाले मकवानपुर क्रिकेट संघका अध्यक्ष वासुलाल श्रेष्ठलाई खेल सामग्री हस्तान्तरण गर्नुभएको हो ।
दुई महिनाअघि संघले उपमहानगरपालिकामा माग गरेअनुसार खेल सामग्री उपलब्ध गराएको मकवानपुर क्रिकेट संघका कार्यबाहक सचिव विनोद बानियाँले जानकरी दिनुभयो । उपमहानगरपालिकाले १ लाख ५९ हजार रुपैयाँ बराबरको नेट २ वटा, फुल म्याट एउटा, बल ५० वटा, शारीरिक व्यायामका सामान सहयोग गरेको हो ।
खेल सामग्री हस्तान्तरण गर्नुहुँदै नगर प्रमुख लामाले चालु आर्थिक वर्षमा उपमहानगरपालिकाले क्रिकेटका लागि २ लाख ५० हजार रुपैयाँ बजेट छुट्याइएकोमा आगामी आर्थिक वर्षमा बजेट रकम थप गरिने बताउनुभयो । मकवानपुर क्रिकेट टिमले विभिन्न स्थानमा आयोजित प्रतियोगितामा उत्कृष्ट प्रदर्शन गर्दै आएको बताउनुहुँदै उहाँले आगामी दिनमा उपमहानगरपालिकाले संघलाई आवश्यक सहयोग गरिने बताउनुभयो । खेल सामग्री हस्तान्तरण कार्यक्रममा मकवानपुर जिल्ला खेलकुद विकास समितिका अध्यक्ष वेश खड्गीको पनि उपस्थिति रहेको थियो ।
