हेटौंडाः जनक शिक्षा सामग्री केन्द्र लिमिटेड बागमती प्रदेश कार्यालय, भरतपुर चितवनले शैक्षिक सत्रका लागि चाहिने सम्पुर्ण पाठ्यपुस्तक तयार रहेको जानकारी दिएको छ । केन्द्रले मकवानपुर, बारा, पर्सा, रौतहट, नवलपरासी र चितवनमा पुस्तक वितरण गर्दछ ।
कोरोना महामारीको कारण देशमा भैरहेको लकडाउनले गर्दा चितवन बाहेक अन्य ५ वटा जिल्लाका विक्रेताहरुले पाठ्यपुस्तक खरिद गर्न ढिलाई गरेको जनक शिक्षा सामग्री केन्द्र लिमिटेड बागमती प्रदेश कार्यालयका प्रमुख रामविनय श्रेष्ठले जानकारी दिनुभयो । केन्द्रबाट संस्थागत विद्यालयको पाठ्यपुस्तक धेरै गैसकेको र सामुदायिकको भने अर्डर नै नआएको बताउनुभयो । यता मकवानपुरका व्यवसायीले भने जनशिक्षा सामग्री केन्द्रले पुस्तक उपलब्ध नगराएको भन्दै जिल्लामा पुस्तक नआएको बताएका थिए ।
केन्द्र प्रमुख श्रेष्ठले चितवन जिल्लामा लगभग पाठ्यपुस्तक गैसकेको र नवलपरासीमा लाने क्रम सुरु भएको बताउनुभएको छ । विभिन्न जिल्लाहरुबाट जनक शिक्षा सामग्री केन्द्र चितवनमा पाठ्यपुस्तक नभएको गलत समाचार आएको भन्दै ६ वटै जिल्लालाई पुग्ने सम्पुर्ण पुस्तक केन्द्रमा भएको जिकिर गर्नुभयो । मकवानपुरका कालिका, स्मारिका लगायत ८ वटा पुस्तक विक्रेताहरुले दर्ता गराइसकेको र १÷२ दिनमा पुस्तक पठाइने उहाँले बताउनुभयो । पुस्तक वितरणमा सामाजिक दुरि कायम राख्न, भिडभाड हुन नदिन, अनलाइन मार्फत म्यासेन्जर, भाइबर लगायतबाट अर्डर गर्ने बिल बनाउने र रकम केन्द्रको खातामा जम्मा गरेर पुस्तक पठाइरहेको उहाँले बताउनुभयो ।
विक्रेताहरुले केन्द्रमा पुस्तक अभाव भएको आरोपलाई चिर्दै केन्द्र प्रमुख श्रेष्ठले सम्पुर्ण पुस्तक तयार रहेको र विक्रेताहरुलाई लकडाउनले गर्दा पुस्तक लैजान असहज भएको प्रष्ट पार्नुभयो । गत शैक्षिक सत्रसम्म कक्षा १ देखि कक्षा ५ सम्मको पुस्तक रंगीन थियो । यो शैक्षिक सत्रबाट कक्षा १ देखि कक्षा ८ सम्मको पाठ्यपुस्तक रंगीन छापिएको छ । जनक शिक्षा सामग्री केन्द्रले वितरण गर्ने कक्षा २ देखि १० सम्मकै पाठ्यपुस्तक तयारी अवस्थामा रहेको श्रेष्ठले बताउनुभयो ।
