हेटौंडाः जिल्लामा खेलकुदका गतिविधिलाई प्रोत्साहन गर्नका लागि खेलकुद पत्रकार मञ्च मकवानपुरले पत्रकारिता तालिम र खेलकुद प्रतियोगिता गर्ने भएको छ । मञ्चका अध्यक्ष राजन दाहालको अध्यक्षतामा आइतबार बसेको बैठकले जिल्लामा खेल पत्रकारितामा चासो राख्ने पत्रकारहरुका लागि दुई दिने तालिम र मैत्रिपूर्ण मिडियाकप रनिङशिल्ड फुटसल प्रतियोगिता सञ्चालन गर्ने निर्णय गरेको हो ।
मञ्चले २०८० बैशाख १५ र १६ गते पत्रकारिता तालिम सञ्चालन गर्ने भएको छ भने बैशाख २९ र ३० गते फुटसल प्रतियोगिता गर्ने निर्णय गरेको मञ्चका सचिब गणेश दर्पण अधिकारीले जानकारी दिनुभएको छ । मञ्चले आयोजना गर्ने तालिमको संयोजनको जिम्मेवारी सचिब अधिकारीलाई दिइएको छ भने प्रतियोगिताको संयोजन गर्ने जिम्मेवारी नवीन तिमल्सिनालाई दिइएको छ । दुबै कार्यक्रम आयोजनाका लागि हेटौंडा उपमहानगरपालिकाले आर्थिक सहयोग गरेको छ ।
बैशाखको २९ र ३० गते सञ्चालन हुने फुटसल प्रतियोगिताका लागि मञ्चले पहिलो पुरस्कार ३० र द्वितीय पुरस्कार २० हजार नगदसहित शिल्ड, मेडल र प्रमाणपत्र प्रदान गर्ने भएको छ । बैठकले मञ्चको कोषाध्यक्ष रहेका सुदिप शिवाकोटी बिदेशमा रहनुभएकोले कार्यसमिति सदस्य पुष्पराज अधिकारीलाई कोषाध्यक्षको जिम्मेवारी दिने निर्णय गरेको छ ।
