हेटौंडाः मकवानपुर बहुमुखी क्याम्पसको स्वतन्त्र विद्यार्थी युनियन (स्ववियु)को अध्यक्षमा अखिल क्रान्तिकारीका छोइसाङ लामा विजयी भएका छन् । सोमबार बिहान सार्वजनिक भएको अन्तिम मतपरिणाम अनुसार लामाले ८ सय १३ मत प्राप्त गरी विजयी भएका हुन् ।
अध्यक्षका अर्का आकांक्षी अनेरास्ववियुका नवराज शर्माले ६ सय ८२ मत प्राप्त गरे । सचिवमा क्रान्तिकारीका वर्षाद घिमिरे ७ सय ६७ मत प्राप्त गरी विजयी हुँदै गर्दा प्रतिस्पर्धी अनेरास्ववियुका विश्वास पराजुलीले ७ सय ५० मत प्राप्त गरे । कोषाध्यक्षमा अनेरास्ववियुकी हिमानी कुमारी सुवेदी निर्वाचित भइन् । सुवेदीले ८ सय ४ मत प्राप्त गर्दा प्रतिस्पर्धी क्रान्तिकारीका उद्धव प्रसाद अधिकारीले ७ सय २ मत प्राप्त गरे ।
यस्तै सदस्यहरुमा क्रान्तिकारीबाट नारायण पुडासैनी, सुजन सिलवाल र राहुल डिम्डुङ निर्वाचित भएका छन् भने अनेरास्ववियुबाट प्रसिद्ध रेग्मी, प्रशन श्रेष्ठ, कुशल पराजुली, दिपेश कार्की र झरना थिङ निर्वाचित भएका छन् । ३ हजार ९१ मतदाता रहेको मकवानपुर बहुमुखी क्याम्पसमा १ हजार ५ सय ७४ मत खसेको थियो ।
