हेटौंडाः मकवानपुरको कैलाश गाउँपालिकामा आज शनिबारबाट अध्यक्ष कप फुटबल प्रतियोगिता सुरु हुँदैछ । पहिलो संस्करणको प्रतियोगिता शनिबार गाउँपालिकाका अध्यक्ष लोकबहादुर मोक्तानले उद्घाटन गर्नुहुने कैलाश खेलकुद विकास समितिका अध्यक्ष मोहन वाइबाले बताउनुभयो ।
कैलाश–९, नामटारमा हुने प्रतियोगितामा पालिकाका १० वटै वडाका टिमको सहभागिता रहनेछ । प्रतियोगिताको उद्घाटन खेलमा शनिबार दिउँसो १ बजे २ नम्बर वडा र १० नम्बर वडाबीच प्रतिस्पर्धा हुनेछ । यस्तै, शनिबारको दोस्रो खेलमा दिउँसो ३ बजे वडा नम्बर ५ र ७ बीच प्रतिस्पर्धा हुनेछ । नकआउट प्रणालीमा हुने खेलमा ९ ‘ए’ साइड खेलाइने जनाइएको छ ।
प्रतियोगिताको विजेता टिमले नगद ६० हजार रुपैयाँ, द्वितीय हुने टिमले ४० हजार र तृतीय हुने टिमले नगद २० हजार रुपैयाँ पुरस्कार पाउनेछन् । प्रतियोगिताको फाइनल खेल मंगलबार हुनेछ ।
