हेटौंडाः हेटौंडा–१२, पदमपोखरीस्थित सनराइज इंग्लिस बोर्डिङ स्कूलको २० औं अभिभावक दिवस शनिबार विविध कार्यक्रम गरी मनाइएको छ । अभिभावक दिवसमा विद्यार्थीले नृत्य, गायन तथा नाटक कला प्रस्तुत गरेका थिए भने शैक्षिक प्रदर्शनी र खानाको स्टल पनि विद्यार्थीले नै सञ्चालन गरेका थिए । अभिभावक दिवसमा अतिथिलाई सनराइजले फुलसहितको गमला प्रदान गरेको छ ।
विद्यालयको आमन्त्रणलाई स्वीकारेर अभिभावक दिवसमा सहभागी हुने अतिथिलाई उपयोगी र सुन्दर उपहारस्वरुप फुलसहितको गमला वितरण गरिएको विद्यालयका प्रिन्सीपल रामकुमार श्रेष्ठको भनाइ छ । विद्यालय व्यवस्थापन समितिका अध्यक्ष चन्द्रबहादुर मोक्तानको अध्यक्षता तथा जिल्ला समन्वय समिति (जिसस) मकवानपुरका प्रमुख ललित घलानको प्रमुख आतिथ्यमा अभिभावक दिवस समारोह भएको हो । अभिभावक दिवसमा १३ नम्बर वडा अध्यक्ष पेम्बा लामा, निजी तथा आवासीय विद्यालय अर्गनाइजेसन (प्याव्सन) मकवानपुरका अध्यक्ष विनोद सुवेदी, सचिव नवीन केसीको पनि आतिथ्य रहेको थियो ।
अभिभावक दिवसमो अवसरमा कक्षागतरुपमा प्रथम हुन सफल विद्यार्थी, नियमित विद्यालय आउने विद्यार्थी, अनुशासित विद्यार्थी, सरसफाई कायम राख्ने विद्यार्थीलाई सम्मान गरिएको थियो । विद्यालयले ८ जना शिक्षक र २ जना कर्मचारीलाई पनि उत्कृष्ट कार्य गरेवापत सम्मान गरेको छ । अभिभावक दिवसकै अवसरमा कराँतेको प्रशिक्षणमा रहेका विद्यार्थीलाई बेल्ट वितरणको कार्य समेत गरिएको थियो । १० कक्षासम्म पठनपाठन हुने सनराइजमा एक हजार एक सय विद्यार्थी अध्ययनरत छन् ।
