हेटौंडाः पाँचौ संस्करणको स्थानीय तह शहीद स्मृति अन्तर्राष्ट्रिय मकवानपुर गोल्डकप फुटबल प्रतियोगिता अन्तर्गत आज मंगलबार हिमालयन शेर्पा क्लब काठमाडौं र बागमती युवा क्लब सलार्हीबीच प्रतिस्पर्धा हुनेछ । खेल हेटौंडा–५ स्थित पिप्ले–क्याम्पा रंगशालामा दिउँसो ३ बजे हुनेछ ।
प्रतियोगिता अन्तर्गत सोमबारको खेलमा एनआरटी काठमाडौंलाई हराउँदै बीरगंज युनाइटेड पर्सा क्वाटरफाईनलमा प्रवेश गरेको छ । एनआरटीलाई ३–२ गोलअन्तरले हराउँदै बीरगन्ज युनाईटेड क्वाटरफाईनलमा प्रवेश गरेको हो । अब बीरगन्जले क्वाटरफाईनलमा एभिनियर एफसी क्यामरुनसँग भोलि बुधबार प्रतिस्पर्धा गर्नेछ ।
प्रतियोगितामा १२ वटा टिम सहभागी छन् । प्रतियोगिताको उपाधि विजेताले १५ लाख रुपैयाँ र उपविजेताले १० लाख रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले नगद ५० हजार रुपैयाँ प्राप्त गर्नेछन् भने विधागत उत्कृष्ट खेलाडीहरुले २५–२५ हजार रुपैयाँ प्राप्त गर्नेछन् ।
