हेटौंडाः सातौं एनभिए क्लब भलिबल च्याम्पियनसीपमा सहभागी हुन बागमती प्रदेशको भलिबल टिम छनोट हुँदैछ । महिला र पुरुष दुबै टिम आज मंगलबारसम्ममा छनोट गरिनेछ । पुरुषतर्फको टिम निर्माणका लागि हेटौंडामा छनोट प्रक्रिया सोमबारदेखि सुरु भएको छ भने महिलातर्फको छनोट काभ्रे जिल्लाको वनेपामा भइरहेको छ ।
हेटौंडामा सोमबार मकवानपुर जिल्ला भलिबल संघका अध्यक्ष बसन्तकुमार सिटौला र मकवानपुर जिल्ला खेलकुद विकास समितिका अध्यक्ष वेश खड्गीको उपस्थितिमा छनोटको प्रक्रिया भएको छ । पुरुषतर्फ मकवानपुरसहित सिन्धुली, रामेछाप, चितवन र काभ्रेका खेलाडी सहभागी छन् । यस्तै महिलातर्फको छनोटमा पनि मकवानपुरसहित ५ जिल्लाका खेलाडीको सहभागिता रहेको छ । आज मंगलबार महिला र पुरुष दुबैतर्फ १२÷१२ जना खेलाडीको टिम घोषणा गरिनेछ ।
यही पुस २४ गतेदेखि माघ १ गतेसम्म हुने च्याम्पियनसीपको उपाधि विजेताले नगद ४ लाख रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेताले २ लाख रुपैयाँ प्राप्त गर्नेछ ।
