हेटौंडाः रोटरी क्लब अफ हेटौंडाको आयोजनामा मंगलबार २ स्थानमा भएको निःशुल्क आँखा परीक्षण शिविरमा ७ सय ७१ जनाको आँखा परीक्षण गरिएको छ । मकवानपुरको बागमती गाउँपालिका–९, बेतिनी स्वास्थ्य चौकी र रौतहट जिल्लाको पहोरा नगरपालिका–८, नरकटियास्थित ओम माध्यमिक विद्यालयमा निःशुल्क आँखा परीक्षण शिविर आयोजना गरिएको हो ।
७ सय ७१ जनाको आँखा परीक्षण गर्दा १ सय १२ जना मोतीबिन्दुका बिरामी पहिचान भएको आँखा शिविर कार्यक्रमका संयोजक प्रमेश प्रधानले जानकारी दिनुभएको छ । मकवानपुरको बागमती गाउँपालिका–९, बेतिनी स्वास्थ्य चौकीमा भएको शिविरमा ४ सय ५० जनाको आँखा परीक्षण गरिएको छ । उक्त शिविरमा ९५ जना मोतिबिन्दुका बिरामी फेला परेको बताइएको छ । यस्तै, रौतहट जिल्लाको पहोरा नगरपालिका–८, नरकटियास्थित ओम माध्यमिक विद्यालयमा भएको शिविरमा १७ जना मोतिबिन्दुका बिरामी भेटिएका छन् ।
निःशुल्क आँखा शिविर मंसिर २४ गतेसम्म आयोजना गर्न लागेको प्रधानले जानकारी दिनुभएको छ । परीक्षण शिविरमा मोतिविन्दु पहिचान भएका बिरामीलाई निःशल्क शल्यक्रियाको व्यवस्थासमेत मिलाइएको संयोजक प्रधानले बताउनुभएको छ । रोटरी क्लब अफ हेटौंडा, रोट्र्याक्ट क्लब अफ हेटौंडा र हेटौंडा सामुदायिक आँखा अस्पतालको संयुक्त आयोजनामा आँखा शिविर भएको उहाँले बताउनुभयो । शिविरमा छनोट गरिएका बिरामीहरुलाई मोतिबिन्दुको शल्यक्रियाका लागि हेटौंडा सामुदायिक आँखा अस्पतालमा ल्याइने र बिरामीहरुको अन्तिम परीक्षणपश्चात्मात्र शल्यक्रिया गरिनेछ । बिरामीका लागि आउने, जाने, खाने, बस्ने र मोतिबिन्दुको शल्यक्रिया एवम् औषधि सम्पूर्ण निःशुल्क हुनेछ ।
