हेटौंडाः मकवानपुर प्रहरीले अवैध लागुऔषधसहित एक जनालाई पक्राउ गरेको छ । पक्राउ पर्नेमा हेटौंडा–११ थानाभर्याङका २४ वर्षीय सुमन लामा रहेको जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले जानकारी दिनुभयो ।
बिहिबार बिहान ११ बजेर १० मिनेटको समयमा पूर्व–पश्चिम राजमार्गअन्तर्गत हेटौंडा–१५ रातोमाटेस्थित प्रहरी चौकी रातमाटेबाट प्रहरी सहायक निरीक्षकको कमाण्डमा खटिएको टोलीले वीरगंजबाट नारायणगढतर्फ जाँदै गरेको ना ५ ख १७५८ नम्बरको बसलाई रोकेर सुरक्षाजाँच गर्दा बसमा सवार लामाको साथबाट लागुऔषध बरामद गरेको हो ।
लामाले आफु बसेको सिटकभरमा लुकाई छिपाई ल्याएको लागुऔषध नुरफिन २० एम्पुल, फेनारगन २० एम्पुल र डाईजेपाम २० एम्पुल लागुऔषध बरामद गरेको जनाएको छ । लामालाई लागुऔषधसहित नियन्त्रणमा लिई थप अनुसन्धान गरिरहेको प्रवक्ता कार्कीले बताउनुभयो ।
