हेटौंडाः हेटौंडाबाट प्रकाशन हुँदै आएको समृद्ध समाज राष्ट्रिय दैनिक प्रकाशनको १२ वर्ष पूरा गरी १३ वर्षमा प्रवेश गरेको छ । बिहीबार वार्षिकोत्सवको अवसरमा एक कार्यक्रमको आयोजना गरिएको थियो । वार्षिकोत्सवको अवसरमा वर्ष कर्मचारीको रुपमा वितरण व्यवस्थापक सञ्जय कुमार श्रेष्ठलाई नगद ५ हजार रुपैयाँसहित सम्मान गरिएको छ ।
वार्षिकोत्सवको अवसरमा हरेक वर्ष झैं समृद्ध समाज दैनिकले सहभागीलाई मायाको चिनोको रुपमा पुस्तक वितरण गरेको छ । पठन संस्कृतिको विकास गर्नका लागि पुस्तक वितरणको अभ्यास गरिएको समृद्ध समाज दैनिकका सम्पादक सुरेश श्रेष्ठले बताउनुभयो । वार्षिकोत्सवलाई सम्बोधन गर्नुहुँदै सम्पादक श्रेष्ठले जवाफदेही र जिम्मेवार पत्रकारिताको अभ्यासमा अग्रसर रहँदै आएको बताउनुभयो । ३ वर्षअघिदेखि कोभिड–१९ को महामारी र पछिल्लो समय आर्थिक मन्दीका कारण सञ्चार क्षेत्र प्रभावित भएको उल्लेख गर्नुहुँदै आगामी दिनमा समृद्ध समाज दैनिकलाई अझ व्यवस्थित र जनतलाई सूचित गर्ने माध्यमको रुपमा स्थापित गरिँदै लैजाने प्रतिवद्धता व्यक्त गर्नुभयो ।
वरिष्ठ पत्रकार प्रताप विष्टले समृद्ध समाज दैनिक स्वतन्त्र र निश्पक्ष भई समाचार र विचार प्रस्तुत गर्ने समाचारपत्रको रुपमा परिचित रहेको उल्लेख गर्नुभयो । आसन्न प्रदेश सभा सदस्य तथा प्रतिनिधि सभा सदस्य निर्वाचनमा उम्मेदवारको मात्रै परीक्षण नभई मिडियाको पनि परीक्षण भइरहेको विष्टले बताउनुभयो । कार्यक्रममा विभिन्न क्षेत्रका व्यक्तित्वको उपस्थिति रहेको थियो ।
