हेटौंडा, ८ बैशाखः लक डाउनले देश ठप्प प्रायः भइरहँदा मकवानपुरको पुर्वि क्षेत्र बकैया गाउँपालिकामा भने सडक स्तरीकरणको कार्य सुरु भएको छ । बकैया गाउँपालिका वडा नम्बर ६ को सुधादेखि गडुवानसम्म करिब १९ किलोमिटर सडक स्तरीकरणको कार्य शनिबारदेखि सुरु भएको छ । वडाको सुधाबाट ज्यामिरे, गवरस्थान हुँदै गडुवानसम्म सडक स्तरीकरणको कार्य सुरु भएको हो । गडुवानसम्म सडकको स्तरीकरणपछि बारा जिल्लाको रतनपुर जोडिनेछ । सडक निर्माणका लागि २ वटा स्काभेटर प्रयोग गरिएको छ । गाउँपालिकाको ५० लाख र बागमती प्रदेश सरकारको ५० लाख गरी १ करोड बजेटमा सडक निर्माणको कार्य भइरहेको हो ।
सुधा–गडुवान सडकलाई गाउँपालिकाले गौरवको योजनाको रुपमा लिएको र फ्रिज हुने बजेटलाई सदुपयोग गरिएको गाउँपालिकाकी उपाध्यक्ष सरला बोलखेले जानकारी दिनुभयो । सडकको कार्य बैशाख ४ गते एएचपि कन्स्ट्रक्सनसँग सम्झौता भएर बैशाख ६ गते शनिबारबाट काम सुरु भएको कन्स्ट्रक्सनका प्रबन्धक चन्द्र कुमार राईले जानकारी दिनुभयो । सडक निर्माण कार्य असार १० गते सकिने गरी सम्झौता भएको छ । २० किलोमिटर सडक निर्माण कार्यमा खटाइएको २ वटा स्काभेटर प्रयोग भइरहेको प्रबन्धक राईले बताउनुभयो । दुबै स्काभेटरमा एकजना अपरेटर र एकजना सहयोगी गरी २/२ जना मात्र कार्यक्षेत्रमा खटिएको बताइएको छ ।
सुधा–गडुवान सडकखण्डको स्तरीकरणको क्रममा ६ मिटरदेखि १० मिटर सडक फराकिलो गर्ने क्रममा करिब २ किलोमिटर क्षेत्रमा पहाड काट्नुपर्ने छ भने हेम पाइप राखेर कल्भर्ड निर्माण गर्ने, नाला, मेसिनरीवाल पनि निर्माण गर्नुपर्ने छ । सडकस्तरीकरणपछि वर्षा मौसममा पनि यातायातका साधन चल्नेछ । यसअघि वर्षामा सुधादेखि गडुवानतर्फ यातायातका साधन चल्न कठिनाई हुने गरेको थियो ।
