हेटौंडाः मकवानपुरमा जिल्ला स्तरीय अन्तर विद्यालय टी २० क्रिकेट प्रतियोगिता हुने भएको छ । मकवानपुर क्रिकेट संघको आयोजनामा प्रतियोगिता हुने भएको मकवानपुर क्रिकेट संघका कार्यबाहक सचिव बिनोद बानियाँले जानकारी दिनुभयो ।
मकवानपुर क्रिकेट संघका पुर्व कप्तान स्वर्गीय निरज श्रेष्ठको स्मृतीमा क्रिकेट प्रतियोगिता गर्ने अनौपचारिक निर्णय भएको हो । भदौ २५ गतेबाट प्रतियोगिता सुरु गरिने बानियाँले बताउनुभयो । प्रतियोगितामा १६ टिमसम्मको सहभागिता रहेमा नकआउट चरणका आधारमा खेल खेलाइने जनाइएको छ ।
बुधबारबाट प्रतियोगितामा सहभागिता जनाउन विद्यालयहरुमा चिठी पठाउने कार्य सुरु गरिने बानियाँले बताउनुभयो । प्रतियोगिता सञ्चालनको लागि अहिले स्पोन्सर नपाएको र स्पोन्सर पाएमा स्वागत गरिने बानियाँले बताउनुभयो । प्रतियोगितामा प्रथम हुने टिमलाई नगद ३० हजार रुपैयाँसहित शिल्ड, मेडल र प्रमाणपत्र र द्वितीय हुने टिमलाई नगद २० हजार रुपैयाँ प्रदान गरिने जनाइएको छ ।
