हेटौंडाः संयुक्त मोर्चा संघर्ष समिति मकवानपुरले हेटौंडामा सरकारविरुद्ध विरोध प्रदर्शन गर्दै मसाल जुलुस निकालेको छ । आइतबार साँझ हेटौंडाको बुद्धचोकमा मोर्चाले सरकार विरुद्ध प्रदर्शन गर्दै मसाल जुलुस निकालेको हो ।
विप्लप नेतृत्वको नेकपा पार्टीका केन्द्रीय सदस्य तथा मकवानपुर जिल्ला इन्चार्ज सन्देश पौडेलले अहिले सरकारको नेतृत्व गरिरहेकाहरुले देश बेच्ने काम गरिरहेको बताउनुभयो । विभिन्न राष्ट्रघाति सम्झौताहरु गरी नेपाली जनताको हित विपरित काम गरिरहेको उहाँले आरोप लगाउनुभयो । एमसीसी, आइपीएस, एसपीपी, नागरिकता विधेयक जस्ता राष्ट्रघाति सम्झौता गरेर देशलाई विदेशीको हातमा सुम्पिदिने जस्ता काम अहिलेको सरकारले गरिरहेको उहाँले बताउनुभयो । अब नेपाली जनताको अधिकार विदेशीले खोस्ने बेला आउने भन्दै उहाँले विप्लप शान्ति सम्झौतामा आएर विभिन्न सम्झौता भइसक्दा पनि आफ्ना कार्यकर्ताहरु अझै नछुटाएकोमा आपत्ति जनाउनुभयो । उहाँले उनीहरुको तत्काल रिहाईको माग गर्नुभयो । यदि मागको सम्बोधन नभएमा आफुहरुले सशक्त आन्दोलन गर्ने उहाँले चेतावनी दिनुभयो ।
यस्तै विरोध सभालाई सम्बोधन गर्नुहुँदै नेकपा माले मकवानपुर जिल्ला सदस्य कृष्ण प्रसाद दाहालले अहिलेको सरकारले देश बेच्ने काम गरिरहेको र त्यसलाई नेपाली जनताले रोक्नुपर्ने बताउनुभयो । उहाँले आफुहरुले अहिले देश बचाउन बाध्यताले सडक आन्दोलन उत्रिएको र त्यसमा सबै जनताले साथ दिनुपर्ने धारणा राख्नुभयो ।
