हेटौंडाः नागरिकता विधेयक फिर्ता गर्न माग गर्दै हेटौंडामा स्वतन्त्र युवाहरु (नेपाली जनता समूह)ले सडकमा विरोध प्रदर्शन गरेको छ । आइतबार साँझ हेटौंडाको बुद्ध चोकमा जम्मा भई नेपाली जनता समूहले नागरिकता विधेयक विरुद्ध विरोध प्रदर्शन गरेको हो ।
विरोध सभालाई सम्बोधन गर्नु हुँदै नेपाली जनता समूहका संगित श्रेष्ठले नागरिकता विधेयक फिर्ता हुुनुपर्ने बताउनुभयो । श्रेष्ठले नागरिकता विधेयक पारित भएसके पनि राष्ट्रपतिबाट प्रमाणीकरण हुनु बाँकी रहेको र प्रमाणीकरण हुन नदिनबाट रोक्नुपर्ने बताउनुभयो । उहाँले नागरिकता विधेयक जनताको भावना विपरित रहेको धारणा राख्नुभयो । सबै जनता मिलेर नागरिकता विधेयकलाई रोक्नुपर्ने उहाँको भनाई छ । नागरिकता विधेयक फिर्ता नभएसम्म समूहले नागरिकता विधेयक विरुद्ध विरोध प्रदर्शनका कार्यक्रमहरुलाई अगाडी बढाइरहने उहाँले जानकारी दिनुभयो । विरोध प्रदर्शनमा सहभागी समूहले “नागरिक विद्येयक चाहिँदैन, नागरिकता बेच्न पाइदैन” र “किन राखेनौ समय सिमा, कतिमा बेच्यौ आफ्नो आमा” जस्ता नारा लगाएका थिए ।
