हेटौंडाः कोरोना भाइरस (कोभिड–१९) को संक्रमणको जोखिम न्यूनीकरण गर्न सरकारले आव्हान गरेको लक डाउनको समयमा जिल्लाका पालिकाहरुको हालको अवस्था र आगामी योजनाको विषयमा छलफल गर्न जिल्ला समन्वय समिति मकवानपुरको बैठक आज बस्दैछ । जिल्लाका सबै पालिकाले के कसरी काम गरिरहेको छ भनेर जान्न र आवश्यकताअनुसार थप सहजीकरणका लागि बैठक डाकिएको जिल्ला समन्वय समिति मकवानपुरका प्रमुख रघुनाथ खुलालले बताउनुभयो ।
प्रमुख खुलालले जिल्ला समन्वय समितिलाई प्राप्त भएका राहत पनि पालिकाहरुलाई हस्तान्तरण गरिने बताउनुभयो । उद्योग परिसंघ नेपालको बागमती प्रदेश समितिले शुक्रबार बागमती प्रदेश सरकारलाई उपलब्ध गराएको राहत सामग्री बागमती प्रदेश सरकारले जिल्ला समन्वय समितिलाई उपलब्ध गराएकोले उक्त राहत सामग्री प्रदेशको जिल्ला र मकवानपुर जिल्लाकै स्थानीय तहलाई पनि के कति वितरण गर्ने भन्ने आज तय गरिने बताइएको छ । उद्योग परिसंघ नेपालको बागमती प्रदेश समितिले उद्योग संघ मकवानपुरसँगको समन्वयमा शुक्रबार एक हजार प्याकेट राहत सामग्री उपलब्ध गराएको छ ।
