गत बैशाख ३० गते सम्पन्न स्थानीय तहको निर्वाचनबाट निर्वाचित जनप्रतिनिधिहरुले पालिका र वडामा जिम्मेवारी सम्हालेर काम गर्न सुरु गरिसकेका छन् । जनताको सेवा गर्ने प्रतिबद्धता व्यक्त गर्दै चुनावी घोषणापत्र सार्वजनिक गर्दै निर्वाचित भएका जनप्रतिनिधिहरु उत्साहका साथ कामको सुरुवात गर्न थालेका छन् । यद्यपि अहिले आगामी आर्थिक वर्षको बजेट निर्माणको चरणमा पनि रहेकाले उल्लेखनीय कामको सुरुवात भइहाल्ने स्थिति भने छैन । निर्वाचित जनप्रतिनिधिहरुको सुरुवाती काम र आगामी योजनाका विषयमा समाज संवाददाता आरजु सत्यालले हेटौंडा उपमहानगरपालिका २ नम्बर वडा अध्यक्ष विष्णुगोपाल महर्जनसँग गर्नुभएको कुराकानीः
समाजः वडा अध्यक्ष हुनुअघि कस्तो तयारी थियो ? बिजयी हुनुभएकोमा कस्तो महसुस भइराखेको छ ?
महर्जनः म पहिला कर्मचारी जीवन बिताएको मान्छे । मैले करिब १७ वर्ष हेटौंडा सिमेन्ट र २४ वर्ष हेटौंडा नगरपालिकामा काम गरेको हो । मैले नगरपालिकामा काम गरिरहँदा वडास्तरमा अथवा नगरपालिकाभित्रै विभिन्न खालका कामहरु देखेको थिएँ । मलाई पनि त्यो काम गर्ने इच्छा थियो । म सधैं केही न केही काम गरिरहने मान्छे, म सामाजिक क्षेत्रमा धेरै लागेको मान्छे र वडामा रहेर एकचोटि जनताको सेवा गरौं भन्ने हिसाबले तयारी गरेर आएको हुँ । अहिले मैले दिनदिनै जनताको काम गरिराखेको छु । करिब करिब आज १७, १८ दिन भयो हामीले काम गर्न थालेको । जनतासँग प्रत्यक्ष वडामै गएर, जनतासँग सिधै भेटेर उहाँहरुको समस्यासँग काम गर्न पाउँदा मलाई अत्यन्तै खुसी लागेको छ ।
समाजः अब वडामा के काम गर्नुपर्छ जस्तो लाग्छ तपाईंलाई ?
महर्जनः वडामा सामान्यतया यहाँका विकास निर्माणका कुरादेखि लिएर, सामाजिक रुपान्तरणका कुरादेखि लिएर, हाम्रो आयआर्जन कुरा र सम्पूर्ण वडाको विकास कसरी हुन्छ भन्ने कुराहरु गर्नुपर्र्ने मैले देखेको छु ।
समाजः तपाईंले पहिलो इन्जिनियरको रुपमा प्राविधिक काम गर्नुभयो । त्यो अनुभवले अहिलेको काममा कसरी सजिलो होला ?
महर्जनः विगतमा प्राविधिकको रुपमा काम गर्दा मैले विशेषगरी विकास निर्माणको काम गरेँ । त्यसले मलाई आगामी दिनमा विकास निर्माणका काम गर्दा धेरै नै सहयोग हुन्छ जस्तो लागेको छ । म आफू नगरपालिकामा काम गर्दा शहीद स्मारक, भूटनदेवी मन्दिरलगायतका धेरै धार्मिक पर्यटकीय स्थलहरुमा काम गरेको छु । त्यो कारणले गर्दाखेरी अहिले आफ्नै वडामा केही काम गर्न सकिन्छ कि भन्ने लागेको छ ।
समाजः वडा अध्यक्ष हुँदा कस्तो चुनौती सामना गर्नुपर्छ जस्तो लाग्छ, तपाईंलाई ?
महर्जनः वडामा अहिले थुप्रै चुनौतीहरु छन् । वडाका विपन्न वर्गका कुराहरु, विकास निर्माणका कुराहरु छन् । धेरै जटिल समस्याका कामहरु छन्, जुन चुनौतीपूर्ण छन् । चुनौती भइरहँदा त्यसलाई हामीले समाधान गर्न सक्यौं भने त्यसलाई अवसरका रुपमा मैले देखेको छु ।
समाजः वडामा के कस्ता काम गर्ने योजना बनाउनु भएको छ ?
महर्जनः वडामा गर्ने कामको हामीले चुनावमा प्रतिवद्धतापत्र पनि सार्वजनिक गरेका छौं । त्यो अनुसारका सबै काम गर्ने नै छौं । मैले विषेशगरी हेटौंडामा नभएका काममा ज्येष्ठ नागरिक दिवा सेवा केन्द्र स्थापना गर्ने अरुभन्दा फरक काम छ । विपन्न वर्गका विद्यार्थीलाई छात्रवृत्ति दिनेछौं । ठूलो योजनाका रुपमा चौकीटोलको भाटभटेनीपछाडिको बाटोलाई बेलुका मानिसहरु घुम्न जाने पर्यटकीय स्थलको रुपमा ढुंगा छापेर बाटो बनाउने योजना छ ।
समाजः वडा अध्यक्ष हुनुभएको केही दिन भयो, वडामा केही काम गर्न सुरु गर्नुभयो ?
महर्जनः काम गर्न सुरु गर्न बजेटको आवश्यकता हुन्छ । अहिले हामीसँग बजेट सकिएको अवस्था छ । पुराना प्रतिनिधिहरुले सबै बजेटअनुसारको काम गरिसक्नुभएको छ । यद्यपि मैले निर्वाचनको समयमा प्रतिबद्धता जनाएअनुसार पदबहाली गर्नुअघि नै केही न केही काम गर्छु भनेको थिएँ । त्यसअनुसार संगमचोकमा रहेको ढलमाथिको नमिलेको स्ल्याब मिलाउने काम गरेँ । सँगै संगमचोक र कांग्रेसचोकका खाल्डाखुल्डीलाई मैले व्यक्तिगत पैसा र साथ सहयोगबाट मिलाउने काम गरेको छु ।
समाजः वडामा गर्नैपर्ने कामको सूची बनाउनु भएको छ ?
महर्जनः त्यो बनाइएको छ । हाम्रो वडामा २० वटा टोल विकास समिति छ । सबै टोल विकास समितिलाई एकै ठाउँमा राखेर, तपाईंहरुको के के समस्या छ भनेर अन्तरक्रिया गरेर उहाँहरुको समस्यालाई लिखितरुपमा हामीले टिपोट गरेका छौं । त्यही आधारमा हामी अगाडि बढ्नेछौं ।
समाजः तपाईंलाई जिताउँदै गर्दा मतदाताको के अपेक्षा पाउनुभएको छ ?
महर्जनः हामीले चुनावमा भोट माग्न जाँदा विभिन्न ठाउँमा विभिन्न प्रकारका अपेक्षाहरु आएका छन् । उहाँहरुको समस्याहरु आएका छन् । त्यसलाई हामीले निराकरण गर्नेछौं, सम्बोधन गर्नेछौं भनेर प्रतिबद्धता जनाएका थियौं । अहिले त्यहीअनुसार योजना बनाएर अघि बढिरहेका छौं ।
समाजः तपाईंलाई वडा अध्यक्ष भएकोमा कस्तो लागिरहेको छ ?
महर्जनः वडा अध्यक्ष भएर जनताको सेवा गर्न पाउनु ठूलो अवसर हो । यो अवसरको साथसाथै केही चुनौतीहरु पनि छन् । यी चुनौतीहरुसँग पैंठाजोरी गरेर, यसलाई निराकरण गरेर जनतालाई खुशी बनाउने उद्देश्य हामीले लिएका छौं । देश विकास गर्ने भन्नु नै जनतालाई खुशी पार्नु हो । देश भन्नु जनता नै हो । त्यसैले हामी पनि के गर्दा जनता खुशी हुन्छन् भन्ने कुरामा तल्लिन छौं र त्यही अनुसार अघि बढ्नेछौं ।
