हेटौंडाः बागमती प्रदेश सरकारले गौरवको कार्यक्रमको रुपमा एक विद्यालय एक नर्स कार्यक्रमलाई आत्मसात गर्ने गरेको छ । सुरुवातमा एक विद्यालय एक नर्स कार्यक्रम नमूनाको रुपमा २० वटा विद्यालयमा सञ्चालन गरिएको थियो । अहिले ४ सय ६९ विद्यालयमा एक विद्यालय एक नर्स कार्यक्रम लागु भइसकेको छ ।
एक विद्यालय एक नर्स कार्यक्रम लागु भएका विद्यालयमध्ये ५० विद्यालयमा विभिन्न कारणबाट रिक्त रहेका पदमा बागमती प्रदेशको स्वास्थ्य मन्त्रालयले यसअघि वैकल्पिक सूचिमा रहेको नर्सहरुलाई नै नियुक्त गर्ने तयारी थालेको छ । सोमबार बागमती प्रदेशको स्वास्थ्य निर्देशनालयले एक सूचना प्रकाशित गरेर २०७८ सालमा लिइएको परीक्षामा वैकल्पिक सूचिमा रहेका उम्मेदवारलाई नै नियुक्त गर्ने तयारी गरेको हो ।
प्रदेशका सबै विद्यालयमा एक विद्यालय एक नर्स कार्यक्रम लागु गर्ने योजना भए पनि अहिले छिटो र सहजै नियुक्त गर्ने गरी वैकल्पिक सूचिमा रहेका उम्मेदवारलाई नियुक्ति दिन लागिएको बागमती प्रदेश सरकारका स्वास्थ्य मन्त्री निमा लामाले जानकारी दिनुभएको छ । सबैभन्दा बढी मन्त्री लामाकै जिल्ला सिन्धुपाल्चोकमा ११ वटा विद्यालयमा नर्स रिक्त रहेको छ । वैकल्पिक सूचिमा रहेका उम्मेदवारलाई सूचना प्रकाशित भएको ५ दिन भित्र सेवा गर्न सक्ने ५ वटा पालिकाको नाम उल्लेख गरी आवेदन दिन भनिएको छ ।
रिक्त रहेका ५० विद्यालय मध्ये ३१ वटा विद्यालयमा विद्यालय रहेको पालिकाका कोही पनि वैकल्पिक सूचिमा नरहेको र १९ वटा विद्यालयका पालिकामा भने वैकल्पिक उम्मेदवार रहेको बताइएको छ । वैकल्पिक उम्मेदवार भएका पालिकाको विद्यालयको हकमा योग्यताक्रमका आधारमा नियुक्ति दिने तयारी निर्देशनालयले गरेको छ । वैकल्पिक उम्मेदवारलाई नै नियुक्ति दिनका लागि प्रदेश सरकारले ऐनमा संशोधन समेत गरेको देखिन्छ ।
