हेटौंडाः मकवानपुरका उद्यमी बीके बोसको निधन भएको छ । मंगलबार दिउँसो चितवनस्थित चितवन मेडिकल कलेजमा बोसको निधन भएको हो । ६१ बर्षीय बोस लामो समयदेखि खुट्टाको क्यान्सरको उपचार गराइरहनुभएको थियो ।
हेटौंडा–४, गर्दोईका बोसको मंगलबार नै हेटौंडा–९, कुष्माण्ड त्रिवेणीधाममा अन्त्येष्टी गरिएको छ । लामो समय हेटौंडा औद्योगिक क्षेत्रस्थित सुपर लेमिकोट्स प्रालिको व्यवस्थापकको रुपमा काम गर्नुभएका बोसले पछिल्लो समय नारायणी मिल्क इन्डष्ट्रिज सञ्चालन गर्दै आउनुभएको थियो ।
मकवानपुर जिल्ला व्याड्मिन्टन संघको अध्यक्ष समेत रहनुभएका बोस व्याडमिन्टन खेलको भेट्रान खेलाडी हुनुहुन्थ्यो । व्याडमिन्टन खेलको विकासमा अग्रसर रहनुभएका बोसका छोरा अभिषेक र छोरी माधवी दुबै खेलाडी राष्ट्रियस्तरका खेलाडी हुनुहुन्छ । उद्योग संघ मकवानपुरको द्वितीय उपाध्यक्षसम्म हुनुभएका बोस मकवानपुर उद्योग वाणिज्य संघको एसोसिएटतर्फका सदस्य समेत हुनुहुन्थ्यो ।
