हेटौंडाः बैशाख ३० गते हुने स्थानीय तह निर्वाचनको लागि मनोनयन दर्ता गराएका उम्मेदवारहरुले चाहेमा आज शुक्रबार आफ्नो उम्मेदवारी फिर्ता लिन सक्ने निर्वाचन आयोगले जनाएको छ । आज बिहान १० बजेदेखि साँझ ५ बजेसम्म निर्वाचन अधिकृतको कार्यालयमा गएर उम्मेदवारी फिर्ता लिन सकिनेछ ।
बैशाख ११ र १२ गते उम्मेदवारहरुले निर्वाचनको लागि मनोनयन दर्ता गराएका थिए । यस्तै, निर्वाचन आयोगले आज साँझसम्म उम्मेदवारको अन्तिम नामावली समेत सार्वजनिक गर्दैछ । आयोगले शनिबार भने उम्मेदवारहरुलाई चुनाव चिन्ह प्रदान गर्ने कार्यक्रम तय गरेको छ । स्थानीय तह सदस्य निर्वाचनको लागि मकवानपुरमा २ हजार ३५ जनाको उम्मेदवारी दर्ता भएको थियो । जिल्लामा २ लाख ७२ हजार ४ सय ६२ जना कुल मतदाता रहेको छ । जसमा महिला एक लाख ३४ हजार ५ सय ५२ र पुरुष १ लाख ३७ हजार ९ सय ४ जना र अन्य ६ जना मतदाता रहेको जिल्ला निर्वाचन कार्यालयले जनाएको छ ।
