हेटौंडाः प्रथम बागमती प्रदेश खेलकुद प्रतियोगिताअन्तर्गत आजबाट विभिन्न खेलहरु हुँदैछन् । हेटौंडा–५ स्थित पिप्ले क्याम्पा रंगशालामा प्रथम प्रदेश खेलकुद प्रतियोगिताको उद्घाटन समारोह हिजो भएको थियो । हिजो साँझ बागमती प्रदेशका मुख्यमन्त्री राजेन्द्रप्रसाद पाण्डेले धावक वैकुण्ठ मानन्धरलाई ओलम्पिक टर्च हस्तान्तरण गरी प्रतियोगिताको उद्घाटन गर्नुभएको हो ।
आज आइतबारदेखि बागमती प्रदेशका ५ जिल्लामा विभिन्न प्रतियोगिताहरु १५ दिनसम्म सञ्चालन हुनेछ । बागमती प्रदेशका १३ जिल्लाको सहभागिता रहेको प्रतियोगितामा एथलेटिक्स, फुटबल, भलिबल, कराते, तेक्वान्दो, ब्याडमिन्टन, क्रिकेट र बक्सिङ खेलका १ हजार ८ सय खेलाडीले प्रतिस्पर्धा गर्नेछन् । हेटौंडामा पुरुष फुटबल प्रतियोगिता हुनेछ । फुटबल खेल पिप्ले क्याम्पा रंगशालामा हुनेछ । आज पहिलो खेलमा ललितपुर र चितवनबीचको खेल दिउँसो २ बजे सुरु हुनेछ ।
