हेटौंडाः अन्तर्राष्ट्रिय महिला दिवसको अवसरमा संयुक्त राष्ट्रसंघीय विकास कार्यक्रम (युएनडीपी) ले आयोजना गरेको प्रदेशस्तरीय कविता प्रतियोगितामा मकवानपुरकी सुस्मिता ढुंगाना तृतीय भएकी छन् । सोमबार भर्चुअल माध्यमबाट भएको प्रतियोगितामा हेटौंडा–१ स्थित अमर माध्यमिक विद्यालयमा कक्षा ९ मा अध्ययनरत सुस्मिताले ‘आऊ नारीहरु’ शीर्षकको कविता वाचन गर्दै तृतीय स्थान हासिल गरेकी हुन् ।
बागमती प्रदेशका मावि तहका विद्यार्थीबीच भएको प्रतियोगितामा काठमाडौंको पद्मकन्या विद्याश्रममा कक्षा–९ मा अध्ययनरत कविता राउत प्रथम भइन् । राउतले ‘दिगो विकासका लागि लैंगिक समानता’ शीर्षकमा कविता वाचन गरेकी थिइन् । यस्तै ‘दिगो भविष्यका लागि आजै लैंगिक समानता’ शीर्षकमा कविता वाचन गर्ने काठमाडौंको कीर्तिपुर नागरपालिकास्थित मंगल माविमा कक्षा–९ मा अध्ययनरत अस्मिता सुवेदी द्वितीय भएकी छन् ।
‘दिगो भविष्यका लागि आजै लैंगिक समानता’ भन्ने नारा साथ मार्च ८ मा अन्तर्राष्ट्रिय महिला दिवस मनाइ“दैछ । सात वटै प्रदेशबाट प्रथम हुने कविहरुले मार्च ८ मा हुने राष्ट्रव्यापी कविता प्रतियोगितामा कविता वाचन गर्नेछन् । युएनडीपी र एनसेलले प्रथम, द्वितीय र तृतीयलाई सोही अवसरमा पुरस्कार प्रदान गर्ने बताइएको छ ।
