हेटौंडाः बागमती प्रदेश सरकारको कृषि तथा पशुपन्छी विकास मन्त्रालयले प्रदेशभर रहेका भेडाबाख्राहरुलाई स्थानीय तहबाट पिपिआर रोग नियन्त्रण तथा रोकथामका लागि एक हप्ते पिपिआर खोप लगाउने अभियान सुुरु गर्ने भएको छ ।
मन्त्रालयले सोमबार पत्रकार सम्मेलन गर्दै आज मंगलबारबाट सुरु हुने खोप अभियान फागुुन २ गतेसम्म सञ्चालन हुने मन्त्रालयका प्रवक्ता राजन ढकालले बताउनुभयो । प्रदेशले पहिलो पटक खोप अभियान सञ्चालन गरेको बताउँदै सबै स्थानीय तहमा खोप केन्द्र र भ्याक्सिनेटर तयारी अवस्थामा रहेको बताउनुभयो ।
बागमती प्रदेशमा करिब ९३ हजार ६ सय ३९ भेडा, २३ लाख ५१ हजार २ सय १७ बाख्रा रहेको मन्त्रालयले जनाएको छ । प्रदेशमा पिपिआर रोगका कारण वर्षेनी धेरै संख्यामा भेडा बाख्राको मृत्यु भई कृषकहरुले ठूलो क्षति व्यहोर्नु परेको मन्त्रालयले उल्लेख गरेको छ । पिपिआर रोगकै कारण भेडाबाख्रापालन गर्ने कृषक तथा व्यवसायीहरु व्यवसायबाट पलायन हुनसक्ने सम्भावनालाई मध्येनजर गर्दै पिपिआर खोप अभियान ल्याइएको पशु तथा मत्स्य विकास निर्देशनालयका प्रमुख डा. रामप्रकाश प्रधानले बताउनुभयो । प्रदेशमा १ हजार १ सय ३७ वटा खोप केन्द्र र ४ सय ६० वटा भ्याक्सिनेटर रहेको छ । पहिलो चरणमा १ करोड १९ लाख बजेटमा ९० हजार मात्रा खोप आएको र नपुग खोप दोस्रो चरणमा माग गरी ल्याउने प्रधानले बताउनुभयो ।
